दिल्‍लीराज अर्याल

लुम्बिनी प्रदेशका मुख्यमन्त्री चेतनारायण आचार्य र बेलायत सरकारकी इन्डो–प्यासिफिक मामिलामन्त्री सीमा मल्होत्राबीच रुपन्देहीमा भेटवार्ता भएको छ । भेटमा नेपाल र संयुक्त अधिराज्यबीचको ऐतिहासिक सम्बन्ध, विकास साझेदारी र लुम्बिनी प्रदेशको विकास प्राथमिकताबारे छलफल भएको थियो । मुख्यमन्त्री आचार्यले प्रदेश सरकारको दिगो, समावेशी र रोजगारीमुखी आर्थिक वृद्धिको लक्ष्यबारे जानकारी गराउँदै विभिन्न क्षेत्रमा बेलायतसँग सहकार्य विस्तार हुने विश्वास व्यक्त गरे ।

लुम्बिनी प्रदेश सरकारले आगामी आर्थिक वर्षदेखि आयोजना बैंकमा समावेश भएका योजनालाई मात्र बजेट तथा कार्यक्रममा समेट्ने नीति अघि सारेको छ। मुख्यमन्त्री चेतनारायण आचार्यले योजना छनोटमा प्रदेश सरकार 'निर्मम' बन्ने र विधि तथा मापदण्डका आधारमा मात्र योजना छनोट गरिने बताएका छन्। यस नीतिअन्तर्गत पूर्वाधारतर्फ ३० लाख रुपैयाँभन्दा कम लागतका र अन्य क्षेत्रमा १० लाख रुपैयाँभन्दा कम लागतका योजना प्रदेशस्तरमा नसमेटिने स्पष्ट पारिएको छ।