मन बहादुर थापा

प्रहरीले लागूऔषध सहित देशका विभिन्न स्थानबाट २९ जनालाई नियन्त्रणमा लिएको छ। काठमाडौं, रूपन्देही र बाँके लगायतका स्थानबाट ब्राउनसुगर, हेरोइन र डाइजेपाम जस्ता लागूऔषध बरामद गरिएको छ। यसैगरी, ठमेल क्षेत्रमा अनैतिक क्रियाकलापमा संलग्न भएको आरोपमा नौजना विदेशी महिलालाई पनि पक्राउ गरिएको छ।

बाजुराको हिमाली गाउँपालिका-३ लाम्पाटामा अस्थायी प्रहरी चौकी निर्माण र सीमा विवादलाई लिएर हुम्ला र बाजुराका स्थानीयबीच झडप हुँदा ६ जना घाइते भएका छन्। घाइतेमध्ये चार जनालाई हेलिकप्टरमार्फत उद्धार गरी थप उपचारका लागि सुर्खेत पठाइएको छ।

बाजुराको हिमाली गाउँपालिका–३ लाम्पाटा, रानीसैन क्षेत्रमा सुरक्षा चौकी निर्माण तथा पर्यटन प्रवद्र्धन अभियान चलिरहेका बेला हुम्लाबाट आएको भनिएको समूहले वडा सदस्य पेमा गारा गुरुङको घरमा आक्रमण गरी लुटपाट र तोडफोड गरेको छ। यो घटनालाई रानीसैन क्षेत्रको प्राकृतिक सम्पदा दोहनलाई निरन्तरता दिन गरिएको सुनियोजित हमलाको रूपमा स्थानीयवासी र जनप्रतिनिधिहरूले आरोप लगाएका छन्।

बाजुराको हिमाली गाउँपालिका–३ लाम्पाटामा प्रहरी चौकी निर्माणको विषयलाई लिएर बाजुरा र हुम्लाका स्थानीयबीच झडप हुँदा एक प्रहरीसहित पाँच जना घाइते भएका छन्। लाम्पाटा क्षेत्रमा जडीबुटी र पर्यटकीय सम्भावना रहेकाले दुई जिल्लाका बासिन्दाबीच हरेक वर्ष झडप हुने गरेको छ।