सुहाङ नेम्वाङ

प्रतिनिधि सभाका सांसदहरूले होल्डिङ सेन्टरमा रहेका सुकुम्बासीहरू गम्भीर मानसिक तनाव र मानवअधिकार संकटमा रहेको भन्दै सरकारलाई उनीहरूको पुनर्स्थापना र न्यूनतम मानवअधिकार सुनिश्चित गर्न आग्रह गरेका छन्। कानुन, न्याय तथा मानव अधिकार समितिको बैठकमा सांसदहरूले सुकुम्बासीहरूको अवस्था दयनीय रहेको उल्लेख गर्दै वैज्ञानिक र दीर्घकालीन पुनर्स्थापना योजना आवश्यक रहेको बताएका हुन्। उनीहरूले राज्यले उपलब्ध गराएको न्यूनतम सुविधा पर्याप्त नभएको र गोपनीयता, भेन्टिलेसन तथा वर्षायाममा जोखिम जस्ता समस्या रहेको औंल्याएका छन्।

प्रतिनिधिसभाका सांसदहरूले जनतामाथि बढी कर नलिन सरकारको ध्यानाकर्षण गराएका छन्। उनीहरूले जनतालाई कर तिर्न सहुलियत दिनुपर्ने, अलपत्र सडकको कामलाई तीव्रता दिनुपर्ने, कबाडी कर खारेज गर्नुपर्ने, विद्युत् आपूर्तिमा अवरोध नगर्नुपर्ने, र युवा पलायन रोक्ने नीति निर्माण गर्नुपर्ने लगायतका माग राखेका छन्।