बलावती शर्मा

प्रतिनिधि सभामा सांसदहरूले पछिल्लो समयमा आएको भीषण पानी, हावाहुरी र पहिरोका कारण विभिन्न जिल्लामा प्रभावित भएका नागरिक तथा सडकहरूको विषयमा सरकारको ध्यानाकर्षण गराउँदै तत्काल क्षतिपूर्ति र राहतको व्यवस्था गर्न माग गरेका छन्। सांसदहरूले बागलुङ, गुल्मी, पाँचथर, सिन्धुली लगायतका जिल्लामा भएका क्षतिको विवरण संकलन गरी पीडितलाई उचित राहत दिन आग्रह गरेका छन्।

प्रतिनिधि सभाका सांसदहरूले होल्डिङ सेन्टरमा रहेका सुकुम्बासीहरू गम्भीर मानसिक तनाव र मानवअधिकार संकटमा रहेको भन्दै सरकारलाई उनीहरूको पुनर्स्थापना र न्यूनतम मानवअधिकार सुनिश्चित गर्न आग्रह गरेका छन्। कानुन, न्याय तथा मानव अधिकार समितिको बैठकमा सांसदहरूले सुकुम्बासीहरूको अवस्था दयनीय रहेको उल्लेख गर्दै वैज्ञानिक र दीर्घकालीन पुनर्स्थापना योजना आवश्यक रहेको बताएका हुन्। उनीहरूले राज्यले उपलब्ध गराएको न्यूनतम सुविधा पर्याप्त नभएको र गोपनीयता, भेन्टिलेसन तथा वर्षायाममा जोखिम जस्ता समस्या रहेको औंल्याएका छन्।

सभामुख डोलप्रसाद अर्यालले प्रतिनिधिसभाको ‘आकस्मिक समय’लाई आगामी दिनमा थप व्यवस्थित बनाइने जानकारी दिएका छन्। उनले यस विषयमा कार्यव्यवस्था परामर्श समितिमा छलफल गरिने बताएका छन्। बैठकका क्रममा केही सदस्यले बोल्न खोज्दा सभामुखले उनीहरूलाई बस्न आग्रह गर्दै संसदीय अभ्यासबारे स्पष्ट पारेका थिए।