हाम्रो खेलकुद

अर्जेन्टिनाका फुटबल खेलाडी लियोनल मेस्सी आधिकारिक रूपमा अर्बपतिहरूको क्लबमा सामेल भएका छन्, जसले गर्दा उनी क्रिस्टियानो रोनाल्डोपछि यो उपलब्धि हासिल गर्ने इतिहासकै दोस्रो फुटबलर बनेका छन्। ब्लूमबर्ग बिलियनियर्स इन्डेक्सका अनुसार, मेस्सीको कुल सम्पत्ति १ अर्ब डलरभन्दा माथि पुगेको छ।

नेपाली राष्ट्रिय क्रिकेट टोलीका लेग स्पिनर सन्दीप लामिछाने र शैक्षिक परामर्शदाता कम्पनी ब्रिज इन्टरनेशनल कन्सलटेन्सीबीच पाँच वर्षको लागि सम्झौता नवीकरण भएको छ। पोखरामा आयोजित कार्यक्रममा दुई पक्षबीच यो सम्झौता भएको हो। यसअघि सन्दीप र ब्रिजबीच दुई वर्षको सम्झौता रहेको थियो।

१२ औं नेपाल अन्तर्राष्ट्रिय एमेच्योर गल्फ च्याम्पियनसिप भोलिदेखि गोकर्ण गल्फ क्लबमा सुरु हुँदैछ। नेपाल गल्फ संघद्वारा आयोजित यस प्रतियोगितामा नेपालसहित भारत, बङ्गलादेश, भुटान र श्रीलंकाका ५४ खेलाडीले प्रतिस्पर्धा गर्नेछन्। यो प्रतियोगिता आरएण्डएबाट मान्यता प्राप्त भएकाले खेलाडीहरूले डब्लुएजिआरमा वरियता पाउनेछन्।

म्यानचेस्टर युनाइटेडका कप्तान ब्रुनो फर्नान्डेजले प्रिमियर लिगमा एक सिजनमा सबैभन्दा धेरै २१ असिस्ट गर्ने नयाँ कीर्तिमान बनाएका छन् । उनले ब्राइटन एन्ड होभ एल्बियनविरुद्धको खेलमा असिस्ट गर्दै यो कीर्तिमान कायम गरेका हुन् । यसै खेलमा उनले गोल पनि गरेका थिए ।

प्रिमियर लिग च्याम्पियन आर्सनलले आफ्नो पहिलो खेलमा क्रिस्टल प्यालेसलाई २-१ ले पराजित गरेको छ। सेलहर्स्ट पार्कमा भएको खेलमा आर्सनलका लागि गाब्रियल जेसस र नोनी माडुकेले गोल गरे भने क्रिस्टल प्यालेसका जिन-फिलिप माटेटाले सान्त्वना गोल फर्काए। यो जितले आर्सनललाई लिग उपाधि जितिसकेपछि थप आत्मविश्वास दिएको छ।

ललितपुरको पाटन दरबारबाट सुरु भएको ‘वन रन’ हाफ म्याराथनमा पुरुषतर्फ नेपाल प्रहरीका नागेश्वर अहिर र महिलातर्फ प्रहरीकै सुमित्रा कुमारी चौधरी विजयी भएका छन्। यो प्रतियोगिता विश्वव्यापी रूपमा ३७ देशका १ सय १२ शहरमा एकैदिन सम्पन्न भएको आयोजक एनआरएस स्पोर्ट्स फाउन्डेसनले जनाएको छ।

आईसीसी विश्वकप लिग–२ अन्तर्गत शुक्रबार भएको खेलमा नेपालले अमेरिकालाई १२२ रनले पराजित गरेको छ। कीर्तिपुरस्थित त्रिवि मैदानमा टस जितेर पहिला बलिङ गरेको अमेरिकाविरुद्ध नेपालले ५० ओभरमा ८ विकेटको क्षतिमा ३१७ रन बनाएको थियो। ३१८ रनको लक्ष्य पछ्याएको अमेरिका ४१ ओभर २ बलमा १९५ रनमा अलआउट भयो।

साफ महिला च्याम्पियनसिप फुटबल प्रतियोगितामा नेपालले विजयी सुरुवात गरेको छ। भारतको गोवास्थित जवाहरलाल नेहरू स्टेडियममा सोमबार भएको खेलमा नेपालले भुटानलाई १-० गोलले पराजित गर्‍यो। खेलको २३औँ मिनेटमा गीता रानाको प्रहार भुटानी खेलाडीको खुट्टामा लाग्दै आत्मघाती गोलमा परिणत भएको थियो, जुन नेपालको जितका लागि निर्णायक बन्यो।

नेपाल क्रिकेट संघ (क्यान) ले सन् २०२६ का लागि ३८ पुरुष र २५ महिला खेलाडीको नयाँ वर्गीकरण सार्वजनिक गरेको छ। खेलाडीको प्रदर्शन र योगदानका आधारमा उनीहरूलाई विभिन्न श्रेणीमा विभाजन गरिएको हो। पुरुषतर्फको ‘ए प्लस’ श्रेणीमा कप्तान रोहितकुमार पौडेल, दीपेन्द्रसिंह ऐरी र सन्दीप लामिछाने परेका छन्।

नेपाल क्रिकेट संघ (क्यान) ले सिंगापुरमा हुने एसियन गेम्स क्वालिफायर २०२६ का लागि दीपेन्द्र सिंह ऐरीको कप्तानीमा १४ सदस्यीय नेपाली राष्ट्रिय क्रिकेट टोली घोषणा गरेको छ। यसअघि कप्तान रहेका रोहित पौडेल पनि टोलीमा समावेश छन्। प्रतियोगिता मे ३१ देखि जुन ९ सम्म सिंगापुरमा आयोजना हुनेछ।

मलेसियामा जारी एसियाली खेलकुद महिला क्रिकेट छनोटमा नेपालले चीनलाई १२६ रनको लक्ष्य दिएको छ। टस जितेर पहिले ब्याटिङ गरेको नेपालले २० ओभरमा ५ विकेट गुमाउँदै १२५ रन बनायो, जसमा पूजा महतोले ६३ रनको अर्धशतकीय इनिङ खेलिन्। यो प्रतियोगितामा नेपालको पहिलो खेल हो भने चीनले आफ्नो पहिलो खेलमा इन्डोनेसियालाई पराजित गरेको थियो।

रोयल च्यालेन्जर्स बेंगलुरु (आरसिबी) ले इन्डियन प्रिमियर लिग (आईपीएल) २०२६ को फाइनलमा लगातार दोस्रो पटक स्थान सुरक्षित गरेको छ। मंगलबार धर्मशालामा सम्पन्न पहिलो क्वालिफायर खेलमा गुजरात टाइटन्सलाई ९२ रनले पराजित गर्दै आरसिबीले उपाधि रक्षा गर्ने अवसर पाएको हो। आरसिबीले प्रस्तुत गरेको २५५ रनको विशाल लक्ष्य पछ्याएको गुजरात १९.३ ओभरमा १६२ रनमा समेटियो।