Photo · www.capitalnepal.com
पाल्पाको रम्भा गाउँपालिका ५ फलकुनमा जंगली च्याउ खाँदा ६६ वर्षीया विनिमाया कामु मगर र ३५ वर्षीया बालकुमारी खाम्चाको मृत्यु भएको छ। प्रहरी नायब उपरीक्षक भीमलाल भट्टराईका अनुसार च्याउ खाएर बिरामी परेका उनीहरूको तानसेनस्थित मिसन अस्पतालमा उपचारका क्रममा मृत्यु भएको हो। यस घटनासँगै जिल्लाको तानसेन, निस्दी र माथागढीमा थप १२ जना विषालु च्याउ खाएर बिरामी परेका छन्।
झापामा स्कुल बसको ठक्करबाट चार वर्षीय बालकको मृत्यु
झापाको गौरादह नगरपालिका-७ मा सजग एकता बोर्डिङ स्कुलको बसले ठक्कर दिँदा चार वर्षीय बालक आरोग्य चिमरियाको घटनास्थलमै मृत्यु भएको छ। विद्यालय बिदापछि बसबाट विद्यार्थी ओराल्ने क्रममा यो दुर्घटना भएको हो। प्रहरीले बस र चालक लालबहादुर बस्नेतलाई नियन्त्रणमा लिएको छ।
महाकाली नदीमा नेपाली सेनाद्वारा विपद् व्यवस्थापन तथा उद्धार अभ्यास
नेपाली सेनाको अगुवाइमा कञ्चनपुरको भीमदत्त नगरपालिका-१२ ऐरीस्थित महाकाली नदीमा 'अभ्यास मनसुन-६' नामक विपद् व्यवस्थापन तथा उद्धारसम्बन्धी नमूना अभ्यास गरिएको छ। यस अभ्यासको उद्देश्य विपद्का बेला गरिने उद्धार तथा क्षति न्यूनीकरणका उपायबारे सर्वसाधारणलाई जानकारी गराउनु रहेको छ। अभ्यासमा नेपाली सेनासँगै नेपाल प्रहरी र सशस्त्र प्रहरी बलको टोलीले संयुक्त प्रदर्शन गरेका थिए।
झापामा हावाहुरीले साढे ३ करोडको केरा खेतीमा क्षति
झापाको बाह्रदशी गाउँपालिकामा मङ्गलबार राति आएको हावाहुरीका कारण करिब साढे ३ करोड रुपियाँ बराबरको केरा खेतीमा क्षति पुगेको छ । जिल्ला प्रहरी कार्यालय झापाका अनुसार बाह्रदशी गाउँपालिका–७ मा ६० बिघा क्षेत्रफलमा लगाइएको केरा खेतीमध्ये ३२ बिघामा ठुलो क्षति पुगेको हो ।
म्याग्दीमा पहिरोले बेनी-जोमसोम सडक अवरुद्ध, यात्रु र पर्यटक प्रभावित
म्याग्दीको रघुगंगा गाउँपालिका-२ माथिल्लो बैसरी (सिरुवारी)मा पहिरो खसेपछि मुस्ताङलाई राष्ट्रिय राजमार्गसँग जोड्ने बेनी-जोमसोम सडकखण्ड अवरुद्ध भएको छ। यसका कारण बेनीदेखि मुस्ताङ र जोमसोमदेखि बेनीतर्फ आउँदै गरेका सवारीसाधन बीच बाटोमै रोकिएका छन्। स्थानीयवासीका साथै मुस्ताङ भ्रमण तथा मुक्तिनाथ दर्शनका लागि जाने पर्यटक र तीर्थयात्रीहरू प्रभावित भएका छन्।
