Photo · prasashan.com
अमेरिकाको क्यालिफोर्नियाको गार्डेन ग्रोभ क्षेत्रमा रहेको एक रासायनिक ट्याङ्कीबाट ‘मिथाइल मेथाक्रिलेट’ नामक ज्वलनशील रसायन चुहावट भएपछि करिब ४० हजार मानिसलाई घर छाड्न आदेश दिइएको छ। अग्निनियन्त्रकहरूले ट्याङ्की विस्फोट हुने वा रसायन फैलिने उच्च जोखिम रहेको चेतावनी दिएका छन्। हालसम्म कसैलाई चोटपटक लागेको रिपोर्ट छैन, तर चुहावटको कारण पत्ता लाग्न सकेको छैन।
नवलपरासीमा ट्रकले किच्दा नेपाली सेनाका सिपाहीको मृत्यु
नवलपरासीमा दुई मोटरसाइकल ठोक्किएर सडकमा लडेका नेपाली सेनाका सिपाही दिनेश गिरीलाई पछाडिबाट आएको ट्रकले किच्दा मृत्यु भएको छ । यो दुर्घटना नारायणगढबाट कावासोतीतर्फ जाँदै गरेको मोटरसाइकल र विपरीत दिशाबाट आउँदै गरेको अर्को मोटरसाइकल आपसमा ठोक्किएपछि भएको हो । गम्भीर घाइते गिरीको उपचारका क्रममा अस्पतालमा मृत्यु भएको हो ।
सुकुम्बासी बस्ती हटाएसँगै काठमाडौंमा नदीजन्य विपद्का घटनामा कमी आउने अपेक्षा
काठमाडौं महानगरपालिकाले नदी किनारका सुकुम्बासी बस्ती हटाएसँगै यस वर्ष नदीजन्य विपद्का घटनामा कमी आउने अपेक्षा गरेको छ। नगर प्रहरी वरिष्ठ उपरीक्षक विष्णुप्रसाद जोशीका अनुसार विगतका वर्षमा बाढीजन्य घटना बढी हुने स्थानमा बसोबास हटाइएपछि यस वर्ष छिटफुट घटनाबाहेक कमी आउने विश्वास छ। सामाखुसीदेखि खाडीपाखासम्म भने सावधानी अपनाउनुपर्ने छ।
रौतहटमा बसको ठक्करबाट मोटरसाइकल चालक शेख गुलामको मृत्यु
रौतहटको चन्द्रनिगाहपुरमा महेन्द्र राजमार्गमा यात्रुवाहक बसले विपरीत दिशाबाट आउँदै गरेको मोटरसाइकललाई ठक्कर दिँदा मोटरसाइकल चालक शेख गुलामको घटनास्थलमै मृत्यु भएको छ। प्रहरीले बस चालक लक्ष्मीभक्त ओझा र बसलाई नियन्त्रणमा लिएको छ।
भोजपुरमा विपद् उद्धार अभ्यास ‘अभ्यास मनसुन–छ’ सञ्चालन गरिने
भोजपुरमा मनसुनजन्य प्रकोप तथा अन्य विपद्बाट हुने धनजनको क्षति न्यूनीकरण गर्ने उद्देश्यले नेपाली सेनाको नयाँ श्रीनाथ गणको आयोजनामा ‘अभ्यास मनसुन–छ’ सञ्चालन गरिने भएको छ । यो अभ्यास भोजपुर नगरपालिका–५, बोखिम तथा सदरमुकामको टुँडिखेल क्षेत्रमा नेपाल प्रहरी, सशस्त्र प्रहरी बल नेपाल र अन्य सरोकारवाला निकायहरूको समन्वयमा गरिनेछ । अभ्यासमा पहिरो, आगलागी, भूकम्प तथा सडक दुर्घटनाजस्ता विपद् अवस्थाहरूमा उद्धार, खोज तथा व्यवस्थापनका प्रक्रियाहरू अभ्यास गरिनेछन् ।
