Photo · www.dcnepal.com
हुम्ला जिल्लाको चङ्खेली गाउँपालिका–५ स्थित नेप्का गाउँमा बुधबार बिहान भीषण पहिरो जाँदा डाँफे आधारभूत विद्यालयको भवन पूर्ण रूपमा बगाएको छ। पहिरोले खेतीयोग्य जमिनमा क्षति पुर्याउनुका साथै स्थानीयका गोठहरू पुरेको छ। हालसम्म मानवीय क्षति नभएको र क्षतिको विवरण सङ्कलन कार्य भइरहेको छ।
म्याग्दीमा पहिरोले बेनी–जोमसोम–कोरला सडक अवरुद्ध, यात्रु र पर्यटक प्रभावित
म्याग्दीको रघुगङ्गा गाउँपालिका–२ माथिल्लो बैसरीमा वर्षासँगै पहिरो खसेपछि मुस्ताङलाई राष्ट्रिय राजमार्गसँग जोड्ने बेनी–जोमसोम–कोरला सडकको म्याग्दी खण्ड अवरुद्ध भएको छ। पहिरोका कारण चार वटा गाडी फसेका छन् भने यात्रु तथा पर्यटकहरू प्रभावित भएका छन्। सुरक्षाकर्मीले फसेका यात्रुहरूको उद्धार गरी सुरक्षित स्थानमा लगेका छन्।
रूपन्देहीमा सडक दुर्घटना र डुबेर चार जनाको मृत्यु
रूपन्देहीमा मंगलबार भएका तीन अलग-अलग घटनामा चार जनाको मृत्यु भएको छ। बुटवल र भैरहवामा सडक दुर्घटनामा परी दुई जनाको मृत्यु भएको छ भने घाघरा खोलाको ड्याममा पौडी खेल्ने क्रममा डुबेर दुई जना विद्यार्थीको मृत्यु भएको छ। यसैगरी, सिद्धार्थ रंगशालाभित्र मिनी रोलरले च्यापिएर एक १४ महिने नाबालकको मृत्यु भएको छ।
मनसुनी विपद्: खोज तथा उद्धारका लागि २६ हजार सुरक्षाकर्मी तयारी अवस्थामा
नेपालमा मनसुनी विपद्का घटनामा खोज तथा उद्धारका लागि सरकारले १३४ गोताखोरसहित २६ हजार २१९ सुरक्षाकर्मी तयारी अवस्थामा राखेको छ। राष्ट्रिय विपद् जोखिम न्यूनीकरण तथा व्यवस्थापन प्राधिकरणका अनुसार तीनवटै सुरक्षा निकायका जनशक्ति देशभर आवश्यकता अनुसार परिचालित हुनेछन्। प्राधिकरणकी प्रवक्ता शान्ति महतले मनसुनी विपद्का लागि राष्ट्रिय प्रतिकार्ययोजना तयार पारी लागू भइसकेको र निकायहरूलाई जिम्मेवारी तोकिएको बताइन्।
बसको ठक्करबाट मोटरसाइकल चालक अमृत बेल्बासेको मृत्यु
बुटवलको बेलबासमा पूर्वपश्चिम राजमार्गमा बसले मोटरसाइकललाई ठक्कर दिँदा अर्घाखाँचीका ३० वर्षीय अमृत बेल्बासेको मृत्यु भएको छ। प्रहरीका अनुसार काँकडभिट्टाबाट महेन्द्रनगरतर्फ जाँदै गरेको बस विपरीत दिशाबाट आइरहेको मोटरसाइकलमा ठोक्किएको थियो। गम्भीर घाइते बेल्बासेको उपचारका क्रममा लुम्बिनी प्रादेशिक अस्पतालमा मृत्यु भएको हो।
