त्रिवेणी गण्डक बाँधबाट नहरमा पानी प्रवाह सुरु

पश्चिम नवलपरासीका विभिन्न क्षेत्रमा सिँचाइका लागि बनाइएको नेपाल–गण्डक पश्चिमी नहरमा गणतन्त्र दिवसको अवसर पारेर बिहीबारदेखि पानी छाडिएको छ । अघिल्लो वर्षको तुलनामा यस वर्ष एक साताअघि नै नहरमा पानी छाडिएको हो । झन्डै नौ करोड रुपियाँ लागतमा नहर सफाइ तथा मर्मतसम्भार गरी चालु आर्थिक वर्षका लागि काम सम्पन्न गरिएको छ । गण्डक बाँधबाट ३२ किलोमिटर लम्बाइ रहेको नहरमार्फत पश्चिम नवलपरासीका ६ वटा स्थानीय तहका करिब ७ हजार हेक्टर क्षेत्रफलमा सिँचाइ सुविधा पुग्दै आएको छ ।