गण्डकी प्रदेश सरकार

स्याङ्जाको पञ्चकन्या माध्यमिक विद्यालयमा गण्डकी प्रदेश सरकारको सहयोगमा सञ्चालित ‘सिक्दै कमाउँदै’ कार्यक्रम प्रभावकारी बन्दै गएको छ । यस कार्यक्रममार्फत विद्यार्थीले पढाइसँगै विद्यालयको पाँच रोपनी जग्गामा तरकारी खेती गरी सीप विकास र आम्दानी आर्जन गरिरहेका छन् । विद्यार्थीले उत्पादन गरेका वस्तुको बिक्रीबाट प्राप्त आम्दानीको ७५ प्रतिशत उनीहरूलाई नै दिने व्यवस्था गरिएको छ ।

बागलुङको निसीखोला गाउँपालिका–५ स्थित निसेलढोर जोड्ने ६ किलोमिटर सडक गण्डकी प्रदेश सरकार र गाउँपालिकाको संयुक्त लगानीमा स्तरोन्नति गरी कालोपत्र गरिएको छ। यस स्तरोन्नतिले पर्यटकीय गन्तव्य निसेलढोरमा बाह्रै महिना यातायात सञ्चालनमा सहजता ल्याएको छ।

गण्डकी प्रदेश सरकारले आगामी आर्थिक वर्ष २०८३/८४ को बजेट तथा कार्यक्रममार्फत विनियोजन विधेयकका सिद्धान्त र प्राथमिकता प्रदेशसभामा प्रस्तुत गरेको छ। आर्थिक मामिलामन्त्री जितबहादुर शेरचनले प्रदेशसभा बैठकमा विधेयकका सिद्धान्त र प्राथमिकता प्रस्तुत गर्दै उत्पादन र उत्पादकत्व वृद्धि, रोजगारी सिर्जना र गरिबी निवारणमा जोड दिने बताए। यसका साथै, स्थानीय तहसँगको समन्वयमा ‘एक पालिकाः एक गन्तव्य’ र ‘आदर्श ग्राम’ अवधारणा अगाडि बढाउने तथा ‘उज्यालो गण्डकी प्रदेश’ अभियान सम्पन्न गर्ने सरकारको लक्ष्य छ।

स्याङ्जामा हिंसामा परेका महिलालाई तत्काल संरक्षण र पुनःस्थापनाको व्यवस्था गर्न सञ्चालित अल्पकालीन सेवा केन्द्र प्रभावकारी बन्दै गएको छ। गण्डकी प्रदेश सरकारअन्तर्गतको एकीकृत सेवा कार्यालय स्याङ्जाले पुतलीबजार नगरपालिकाको संयोजकत्वमा जिल्लाका ११ वटै स्थानीय तहसँग सहकार्य गरेर यो केन्द्र सञ्चालनमा ल्याएको हो। हालसम्म २२ जनाले केन्द्रबाट सेवा लिइसकेका छन्, जसमध्ये अधिकांश बलात्कार तथा जबरजस्ती करणी जस्ता गम्भीर हिंसामा परेका महिला रहेका छन्।

गण्डकी प्रदेशका मुख्यमन्त्री सुरेन्द्रराज पाण्डेले गणतन्त्र नेपाली जनताको सामूहिक सङ्घर्षबाट प्राप्त ठूलो उपलब्धि भएको बताएका छन्। उनले गणतन्त्र स्थापनापछि नेपाली जनताले आफ्नै संविधान निर्माण गर्ने अवसर पाएको, समावेशी लोकतन्त्र, सङ्घीय शासन व्यवस्था, मौलिक हक, अभिव्यक्ति स्वतन्त्रता र समानुपातिक सहभागिता जस्ता महत्त्वपूर्ण उपलब्धि हासिल गरेको उल्लेख गरे।

गण्डकी प्रदेश सरकारले आगामी आर्थिक वर्षको बजेटमा पर्यटन, कृषि र रोजगारी प्रवर्धनका कार्यक्रमलाई प्राथमिकता दिने भएको छ। आर्थिक मामिलामन्त्री जितबहादुर शेरचनले प्रदेश सभामा बजेटका सिद्धान्त र प्राथमिकता प्रस्तुत गर्दै प्रदूषण न्यूनीकरण गर्न विद्युतीय सवारीसाधनलाई प्रोत्साहन गरिने र यातायात सेवा सहज बनाउन राइड सेयरिङ सेवा लागू गरिने बताए। सरकारले पोखराकेन्द्रित ‘पोखरा जाऔँ : प्रकृति र संस्कृतिसँग रमाऔँ’ कार्यक्रम चलाउने योजना पनि अघि सारेको छ।

तनहुँको व्यास नगरपालिका र ऋषिङ गाउँपालिका जोड्ने सेती नदीमा निर्माणाधीन पुलको कामले गति लिएको छ। पूर्वाधार विकास कार्यालयका अनुसार निर्माण व्यवसायीलाई निर्देशन दिइएपछि काम तीव्र पारिएको छ। चार पटक म्याद थप भइसकेको उक्त पुलको अन्तिम म्याद २०८३ असोज ३० सम्म पुगेको छ।