व्यास नगरपालिका

तनहुँको दमौलीस्थित सफा सडक क्षेत्रमा आजदेखि लागू गरिएको पार्किङ निषेधको निर्णयविरुद्ध स्थानीय व्यवसायीहरूले पसल बन्द गरेर विरोध प्रदर्शन गरेका छन्। व्यास नगरपालिकाले ट्राफिक व्यवस्थापनलाई व्यवस्थित बनाउने उद्देश्यले यो निर्णय गरेको जनाएको छ, तर व्यवसायीहरूले यसले व्यापारमा प्रत्यक्ष असर पर्ने भन्दै निर्णय पुनर्विचार गर्न माग गरेका छन्।

तनहुँको व्यास नगरपालिका र ऋषिङ गाउँपालिका जोड्ने सेती नदीमा निर्माणाधीन पुलको कामले गति लिएको छ। पूर्वाधार विकास कार्यालयका अनुसार निर्माण व्यवसायीलाई निर्देशन दिइएपछि काम तीव्र पारिएको छ। चार पटक म्याद थप भइसकेको उक्त पुलको अन्तिम म्याद २०८३ असोज ३० सम्म पुगेको छ।

तनहुँका सुकबहादुर विक दुबईमा एक सुपरभाइजरको मृत्यु प्रकरणमा कानुनी संकटमा परेका छन्। त्यहाँको अदालतले मृतक पक्षलाई ८५ लाख रुपैयाँ (दुई लाख दिराम) ब्लड मनी तिर्नुपर्ने फैसला गरेपछि उनको परिवारले आर्थिक सहयोगको याचना गरेको छ। पारिवारिक स्रोतका अनुसार कार्यस्थलमा प्रतिकार गर्ने क्रममा भवितव्य रूपमा सुपरभाइजरको मृत्यु भएको थियो।

तनहुँको व्यास नगरपालिका–१४ रुम्सीमा चट्याङ लागेर दुई महिला घाइते भएका छन्। स्थानीय सन्तराज थापाको घरको आँगनमा चट्याङ पर्दा भीमकुमारी थापा र पुरनमाया थापा घाइते भएको जिल्ला प्रहरी कार्यालय तनहुँले जनाएको छ। घाइतेहरूको प्राथमिक उपचारपछि थप उपचारका लागि भरतपुरस्थित चितवन मेडिकल कलेज रिफर गरिएको छ।

तनहुँको व्यास नगरपालिका-१४ मा सन्तराज थापाको घरमा चट्याङ पर्दा दुई जना गम्भीर घाइते भएका छन्। घाइते हुनेमा नवलपरासीकी ३५ वर्षीया भिमकुमारी थापा र स्थानीय ६७ वर्षीया पुरनमाया थापा रहेका छन्। उनीहरूलाई उपचारका लागि भरतपुरस्थित चितवन मेडिकल कलेज लगिएको छ।