जीवनबहादुर शाही

कर्णाली प्रदेशमा नेपाली कांग्रेस र नेकपा एमालेबीच भएको आलोपालो सरकार परिवर्तनको सहमति कांग्रेसको आन्तरिक विवादका कारण अलपत्र परेको छ। गत चैत्रमा कांग्रेसले सरकारको नेतृत्व गर्ने सहमति भए पनि जेठको मध्यसम्म पनि यस विषयमा कुनै छलफल अघि बढेको छैन। कांग्रेस सभापति गगनकुमार थापाले केही दिनमै कांग्रेसको नेतृत्वमा सरकार बन्ने बताए पनि पार्टीको निर्णयको पर्खाइमा रहेको कांग्रेस संसदीय दलका नेता जीवनबहादुर शाहीले बताएका छन्।

कर्णाली प्रदेश सरकारले आगामी आर्थिक वर्ष २०८३/८४ को नीति तथा कार्यक्रम र बजेटका लागि विभिन्न सरोकारवालाहरूसँग छलफल गरी सुझाव सङ्कलन गरेको छ। आर्थिक मामिला तथा योजना मन्त्रालयले वीरेन्द्रनगरमा आयोजना गरेको छलफलमा दीर्घकालीन विकास, मानव विकास सूचकाङ्क र कुल गार्हस्थ्य उत्पादनमा वृद्धि गर्ने तथा नागरिकको जीवनस्तर उकास्ने उत्पादनमुखी नीति तथा कार्यक्रम र बजेट तर्जुमा गर्ने विषयमा जोड दिइएको छ।

नेपाली कांग्रेसका पूर्वकार्यवाहक सभापति पूर्णबहादुर खड्काले नेपाली कांग्रेस इतिहासकै प्रतिकूल अवस्थामा रहेको बताएका छन् । सुर्खेतको वीरेन्द्रनगरमा आयोजित एक कार्यक्रममा बोल्दै उनले पार्टी छिन्नभिन्न अवस्थामा रहेकाले यसलाई एकताबद्ध र मजबुत बनाउन आफूहरू क्रियाशील रहेको बताए । खड्काले पार्टी विभाजनको अवस्थामा पुगेको भन्दै यसलाई रोक्न पार्टी नेता र कार्यकर्ता गम्भीर हुनुपर्नेमा जोड दिएका छन् ।