दैलेख

वैदेशिक रोजगारीमा आकर्षक तलबको प्रलोभन देखाएर विभिन्न देश पठाइदिन्छु भन्दै ठगी गरेको आरोपमा प्रहरीले भीम लामा र खड्कध्वज शाहीलाई पक्राउ गरेको छ। लामाले युरोप पठाउने भन्दै एक पीडितबाट १ करोड ९३ लाख रुपैयाँ र शाहीले क्यानडा पठाउने भन्दै अर्का पीडितबाट ५ लाख ३२ हजार रुपैयाँ ठगी गरेको उजुरी परेको थियो। पक्राउ परेका दुवैलाई थप अनुसन्धानका लागि वैदेशिक रोजगार विभाग पठाइएको छ।

दैलेखको भैरवी गाउँपालिका–१ स्थित जलजले क्षेत्रमा ठूलो परिमाणमा प्राकृतिक ग्यास रहेको पुष्टि भए पनि दोस्रो चरणको मुख्य काम अगाडि बढ्न नसक्दा परियोजना अन्योलमा परेको छ। यस मुद्दालाई दैलेख र कालिकोटका स्थानीय तहका जनप्रतिनिधि, जिल्ला प्रशासन र सुरक्षा निकायका प्रमुखहरूको संयुक्त बैठकले जोडदार रूपमा उठाएको छ। बैठकले ग्यासको क्षमता एकिन गरी उत्खनन कार्यलाई द्रुतगतिमा अघि बढाउन सरकारसँग माग गरेको छ।

अर्थमन्त्री डा. स्वर्णिम वाग्लेले यस वर्ष सम्पन्न हुनसक्ने आयोजनालाई प्राथमिकता दिँदै बजेट विनियोजन गरिने बताएका छन्। राष्ट्रिय सभाको विकास, आर्थिक मामिला तथा सुशासन समितिको बैठकमा उनले ७०-८० प्रतिशत सम्पन्न भइसकेका आयोजनालाई पर्याप्त बजेट दिएर यसै वर्ष पूरा गर्ने सरकारको लक्ष्य रहेको जानकारी दिए।