बैंकिङ

नेपाल इन्भेष्टमेन्ट मेगा बैंकले आफ्नो २ लाख ४२ हजार ३५४ कित्ता संस्थापक शेयर बिक्रीमा ल्याएको छ। हाललाई बैंकका विद्यमान संस्थापक शेयरधनीहरूले मात्रै यो शेयर खरिदका लागि निवेदन दिन सक्नेछन्। इच्छुक शेयरधनीहरूले ३५ दिनभित्र निवेदन दिनुपर्नेछ र यस अवधिमा आवेदन नपरेमा अन्य व्यक्ति तथा संस्थालाई बिक्री खुला गरिनेछ।

नेपाल राष्ट्र बैंकले बैंक तथा वित्तीय संस्थाहरूमा रहेको अधिक तरलता व्यवस्थापन गर्नका लागि स्थायी निक्षेप सुविधा (एसडीएफ) अब दैनिक रूपमा उपलब्ध गराउने भएको छ। यो नयाँ व्यवस्था २०८३ जेठ १३ गतेदेखि लागू हुनेछ, जसले गर्दा बैंकहरूले हरेक दिन आफ्नो अतिरिक्त रकम राष्ट्र बैंकमा राख्न सक्नेछन्। यसअघि यो सुविधा सातामा दुई दिन मात्र उपलब्ध हुने गरेको थियो।

एनआईसी एशिया बैंकले संस्थागत सामाजिक उत्तरदायित्व अन्तर्गत धनुषाको महेन्द्रनगरस्थित श्री दुधमती राष्ट्रिय प्राथमिक विद्यालयमा शैक्षिक सामग्री सहयोग गरेको छ। बैंकले १३८ भन्दा बढी विद्यार्थीहरूको पठनपाठनलाई सहज बनाउन झोला तथा अन्य आवश्यक शैक्षिक सामग्री उपलब्ध गराएको हो। यस सहयोगले विद्यालयमा गुणस्तरीय शैक्षिक वातावरण निर्माणमा मद्दत पुग्ने बैंकले जनाएको छ।

नेपाल लाइफ इन्स्योरेन्स कम्पनी लिमिटेडले सम्पत्ति शुद्धीकरण तथा आतङ्ककारी कार्यमा हुने वित्तीय लगानी निवारणसम्बन्धी विशेष प्रशिक्षण कार्यक्रम काठमाडौंमा सम्पन्न गरेको छ। कार्यक्रममा नेपाल राष्ट्र बैंकका निर्देशक डा. हरि कुमार नेपालले बीमा क्षेत्रमा सम्पत्ति शुद्धीकरण निवारणसम्बन्धी कानुनी व्यवस्था र कार्यान्वयनबारे प्रस्तुति दिए। कम्पनीका सञ्चालक कमलेश कुमार अग्रवाल र प्रमुख कार्यकारी अधिकृत प्रवीण रमण पराजुलीले संस्थागत सुशासन र प्रभावकारी अनुपालनको महत्वमा जोड दिए।

सर्वोच्च अदालतले बैंक तथा वित्तीय संस्थामा सुशासन कायम गर्न ऐतिहासिक फैसला गर्दै नेपाल राष्ट्र बैंकबाट सचेत वा नसियत (चेतावनी) पाउने बैंकका प्रमुख कार्यकारी अधिकृत (सीईओ) र सञ्चालकहरू पदमा बस्न अयोग्य हुने व्याख्या गरेको छ। अधिवक्ता मधु कुमार चौलागाईँले दायर गरेको रिटमाथि फैसला गर्दै अदालतले यसलाई प्रभावकारी रूपमा कार्यान्वयन गर्न राष्ट्र बैंकका नाममा ‘निर्देशनात्मक आदेश’ जारी गरेको छ। यो फैसलाले बैंकहरूमा सुशासनको समस्यालाई कानुनी रूपमै सम्बोधन गरेको छ।

एनआईसी एशिया बैंकले आफ्नो संस्थागत सामाजिक उत्तरदायित्व अन्तर्गत सुर्खेतको वीरेन्द्रनगरमा रहेको श्री नेपाल राष्ट्रिय प्राथमिक विद्यालयमा पानी ट्यांकी र मोटर जडान गरी हस्तान्तरण गरेको छ। विद्यालयमा स्वच्छ खानेपानीको व्यवस्थापन र शैक्षिक वातावरण सुधार गर्ने उद्देश्यले यो सहयोग प्रदान गरिएको हो।