SwadeshPost

कास्की जिल्ला अदालतले राष्ट्रिय स्वतन्त्र पार्टीका सभापति रवि लामिछानेसहित सहकारी ठगी प्रकरणका प्रतिवादीविरुद्ध दायर गरिएको संगठित अपराध र सम्पत्ति शुद्धीकरणसम्बन्धी मुद्दा खारेज गरेको छ। न्यायाधीश हिमलाल बेल्बासेको एकल इजलासले सहकारी ठगीतर्फको अभियोग दाबी भने कायम राख्दै अन्य अभियोग संशोधन गरेको हो। अदालतको आदेशमा सहकारीको बचत रकम डुबेका जाहेरवालाको मागमा प्रतिवादीविरुद्ध सम्पत्ति शुद्धीकरण तथा संगठित अपराधसम्बन्धी दाबी नरहेको उल्लेख गरिएको छ।

माडी नगरपालिकाले किसानहरूलाई लक्षित गरी निःशुल्क माटो परीक्षण सेवा सुरु गरेको छ। यस सेवा अन्तर्गत किसानले ल्याएको माटोको निःशुल्क परीक्षण गरी उपचार सिफारिस गरिने नगर कृषि शाखाका अधिकृत अनिल बस्यालले बताउनुभयो। यो कार्यक्रम चालु आर्थिक वर्ष २०८२/८३ को स्वीकृत वार्षिक कार्यक्रम अन्तर्गत सञ्चालन भएको हो।

संयुक्त अधिराज्य (यूके) की 'इण्डो प्यासिफिक' र समानतासम्बन्धी मन्त्री सीमा मल्होत्राले नेपालको शैक्षिक गुणस्तर र प्राविधिक शिक्षाको विस्तारमा सहकार्य गर्ने प्रतिबद्धता व्यक्त गरेकी छिन्। 'नेपाल–ब्रिटेन चेम्बर अफ कमर्श एण्ड इण्ड्रस्ट्रिज' द्वारा आयोजित छलफलमा उनले दुई देशबीचको सम्बन्ध गाढा बनाउन शिक्षालाई प्राथमिकतामा राखी मानवीय पुँजीमा लगानी गर्ने जानकारी दिइन्।

पोखरा-१७ छोरेपाटनमा रहेको ऐतिहासिक, धार्मिक र पुरातात्त्विक गुप्तेश्वर गुफामा जेठ १० गते आइतबार एकै दिनमा छ हजार ७८ जनाले टिकट काटेर अवलोकन गरेका छन्। यसबाट गुफा व्यवस्थापन समितिले पाँच लाख २५ हजार ७१५ रुपैयाँ आम्दानी गरेको छ। गुफा कार्यालय प्रमुख नारायण पौडेलका अनुसार गर्मी बढेसँगै पोखरामा पर्यटकको चाप बढेकाले गुफाको आकर्षण बढेको हो।

कङ्गोको पूर्वी भागमा इबोला भाइरसको प्रकोप तीव्र बन्दै गएको छ, जहाँ संक्रमितको संख्या ९०० भन्दा बढी पुगेको छ। रोग नियन्त्रणका प्रयासहरू स्थानीय विरोध, स्वास्थ्यकर्मीमाथि आक्रमण र अविश्वासका कारण प्रभावित भइरहेका छन्। यस प्रकोपमा देखिएको इबोला प्रकार दुर्लभ मानिन्छ र यसका लागि प्रभावकारी खोप वा उपचार सीमित रहेको बताइएको छ।

नेपाली युवा उद्यमीहरूले विकास गरेको ‘वायुदृष्टि’ नामक जलवायु–प्रविधि प्लेटफर्म संयुक्त राष्ट्रसंघको उत्कृष्ट विश्वव्यापी नवप्रवर्तन सूचीमा छनोट भएको छ । संयुक्त राष्ट्रसंघको आर्थिक तथा सामाजिक मामिला विभाग (यूएन डेसा) ले तयार पारेको ‘एसटीआई सोलुसन्स बुक २०२६’ मा विश्वभरका ९०० भन्दा बढी नवप्रवर्तनहरूलाई पछि पार्दै यो नेपाली प्लेटफर्म उत्कृष्ट ६० मा पर्न सफल भएको हो । यसले वायु प्रदूषणलाई वैज्ञानिक र सहज तरिकाले सर्वसाधारणसम्म पुर्‍याउने उद्देश्य राखेको छ ।

राष्ट्रिय कृषक समूह महासंघ, नेपालले वन्यजन्तुबाट हुने क्षति नियन्त्रणका लागि हालै गठन भएको टास्क फोर्समा किसानको प्रतिनिधित्व अनिवार्य हुनुपर्ने माग गरेको छ। महासंघले बाँदर र नीलगाईजस्ता वन्यजन्तुबाट किसानले भोग्दै आएको क्षतिलाई राष्ट्रिय खाद्य सुरक्षासँग जोडिएको गम्भीर संकटका रूपमा व्याख्या गरेको छ। किसानको अनुभव नीतिमा समेटिए मात्र दीर्घकालीन समाधान सम्भव हुने महासंघको तर्क छ।

नेपाल प्रहरीले राष्ट्रिय महिला भलिबल टोलीकी खेलाडी पुनम चन्दलाई सात दिनभित्र कार्यालयमा हाजिर हुन सार्वजनिक सूचना जारी गरेको छ। प्रहरी जवान चन्द २०८२ चैत १५ गतेदेखि गैरहाजिर रहेको र सम्पर्कमा नआएको भन्दै प्रहरी प्रधान कार्यालयले स्पष्टीकरणसहित हाजिर हुन निर्देशन दिएको हो। सात दिनभित्र हाजिर नभएमा प्रहरी सेवाबाट हटाउने प्रक्रिया अगाडि बढाइने सूचनामा उल्लेख छ।