लागूऔषधसहित सुनसरी र उदयपुरबाट ७ जना पक्राउ

गएको २४ घण्टामा २,०५५ सवारीचालक सवारी नियम उल्लंघनको कारबाहीमा परेका छन्। यसबाट राज्यकोषमा २२ लाख ११ हजार ५०२ राजस्व दाखिला भएको छ। काठमाडौं उपत्यका ट्राफिक प्रहरी कार्यालयले मादकपदार्थ सेवन, तीव्र गति, लेन अनुशासन उल्लंघन, निषेधित क्षेत्रमा हर्न बजाउने लगायतका नियम उल्लंघनमा कारबाही गरेको हो।

प्रहरीले वैदेशिक रोजगारीका नाममा ९७ लाख ५८ हजार रुपैयाँ ठगी गरेको अभियोगमा छ जनालाई पक्राउ गरेको छ। पक्राउ पर्नेहरूमा रामबहादुर आले मगर, आशिष कार्की, लोकबहादुर श्रेष्ठ, तुलसा पुन मगर, कृष्णप्रसाद पोखरेल र प्रवीण श्रेष्ठ छन्। उनीहरूले विभिन्न देश पठाइदिने प्रलोभन देखाएर ठगी गरेको प्रहरीको दाबी छ।

सरकारले मेलमिलाप प्रक्रियालाई संस्थागत, सरल र प्रभावकारी बनाउने उद्देश्यले प्रदेश तथा जिल्लास्तरमा ‘मेलमिलाप समन्वय समिति’ गठन गर्ने तयारी गरेको छ। कानुन, न्याय तथा संसदीय मामिला मन्त्रालयका अनुसार मेलमिलाप सम्बन्धी ऐन, २०६८ मा संशोधन गरी मेलमिलापकर्ताको नियुक्तिलाई सरलीकृत गरिनेछ। यसका साथै, विदेशमा भएको मेलमिलापलाई नेपालमा पनि कार्यान्वयन गर्न सकिने गरी ऐन संशोधनको प्रस्ताव गरिएको छ।

सर्वोच्च अदालतले नेपालमा चलिरहेका मुद्दामा विदेशबाट अनलाइनमार्फत बयान र वकपत्र गराउन सकिने आदेश जारी गरेको छ। न्यायाधीशद्वय हरि फुयाल र बालकृष्ण ढकालको संयुक्त इजलासले सूचना प्रविधिको प्रयोगलाई सहज बनाउँदै न्याय सम्पादनको सुगमताका लागि यो निर्णय गरेको हो। यसअघि विशेष अदालतले भ्रष्टाचार मुद्दामा विदेशबाट अनलाइन बयान दिन नसकिने राय दिएको थियो, जसविरुद्ध सर्वोच्चमा पुनरावेदन परेको थियो।