विद्युत् खपत बढ्दा पेट्रोलियम पदार्थको खपत घट्यो, ९९.१% जनसंख्यामा विद्युत् पहुँच

चालु आर्थिक वर्षको १० महिनामा वीरगञ्ज नाका हुँदै १ खर्ब ८१ अर्ब ७० करोड रुपैयाँ मूल्य बराबरको छ थरिका पेट्रोलियम पदार्थ आयात भएको छ। गत आर्थिक वर्षको सोही अवधिको तुलनामा चालु आर्थिक वर्षमा पेट्रोलियम पदार्थको आयात मूल्यमा १६.३५ प्रतिशत अर्थात् २५ अर्ब ५३ करोडको वृद्धि भएको छ। वीरगञ्ज भन्सार कार्यालयका अनुसार यस अवधिमा पेट्रोलियम पदार्थको आयातबाट ६७ अर्ब १९ करोड राजस्व संकलन भएको छ।

ऊर्जा मन्त्रालयले बाढीपहिरोका कारण जलविद्युत आयोजनामा हुने क्षति न्यूनीकरणका लागि ११ अर्ब रुपैयाँको बजेट प्रस्ताव गरेको छ। यसका लागि मन्त्रालयले विपद् पूर्वतयारीलाई प्राथमिकता दिँदै इन्टरएक्टिभ भोइस रेस्पोन्स (आइभीआर) प्रविधि जडान गर्ने र लङ रेञ्ज वाइड एरिया नेटवर्क (लोरावान) पाइलट प्रोजेक्ट अगाडि बढाउने योजना बनाएको छ। यी प्रविधिले बाढी र पहिरोको पूर्वसूचना दिन मद्दत गर्नेछन्।

स्वतन्त्र ऊर्जा उत्पादकहरूको संस्था, नेपाल (इप्पान) ले लाङटाङ राष्ट्रिय निकुञ्जको निर्देशनमा रोकिएका पाँच जलविद्युत आयोजनाको काम पुनः सुरु गराउन कृषि, वन तथा वातावरण मन्त्री गीता चौधरीको ध्यानाकर्षण गराएको छ। इप्पानले निजी क्षेत्रलाई निरुत्साहित गर्ने गरी आयोजना निर्माणमा रोक लगाइएको भन्दै यसमा सहजीकरण गर्न आग्रह गरेको छ। मन्त्री चौधरीले आयोजनाको काम सुचारु गर्न मन्त्रालयको तर्फबाट आवश्यक सहजीकरण हुने र नीतिगत सुधार गरिने आश्वासन दिएकी छन्।

ऊर्जा, जलस्रोत तथा सिँचाइ मन्त्री विराजभक्त श्रेष्ठले आगामी आर्थिक वर्षभित्र नेपाल विद्युत् प्राधिकरण र राष्ट्रिय प्रसारण ग्रिड कम्पनीमार्फत एक दर्जनभन्दा बढी रणनीतिक महत्वका प्रसारण लाइन निर्माण सम्पन्न गर्ने लक्ष्यसहित सरकार अगाडि बढेको जानकारी दिनुभएको छ । उत्पादित विद्युत् खेर जान नदिन र जनताको लगानी सुरक्षित गर्न यो कदम चालिएको उहाँले बताउनुभयो । मन्त्री श्रेष्ठले विद्युत् खपत वृद्धि नभए देश ऋणको जोखिममा पर्न सक्ने उल्लेख गर्दै विभागले विद्युत् खपत विस्तार र प्रसारण पूर्वाधारलाई प्राथमिकता दिनुपर्नेमा जोड दिनुभयो ।