Photo · www.globalaawaj.com
राष्ट्रिय प्रजातन्त्र पार्टी (राप्रपा) की सांसद सरस्वती लामाले कानुन व्यवसायीहरूको सेवा शुल्क नियमन गर्नुपर्ने माग गरेकी छन् भने कानुन, न्याय तथा संसदीय मामिलामन्त्री सोविता गौतमले यौनजन्य हिंसाका पीडितलाई छिटो न्याय सुनिश्चित गर्न सरकार नीतिगत सुधारमा लागेको बताएकी छन्। सांसद लामाले न्यायिक सेवामा लाग्ने अत्यधिक खर्चका कारण आम सेवाग्राहीले आर्थिक बोझ बेहोर्नुपरेको भन्दै शुल्क संरचना कानुनमार्फत निर्धारण गर्न सरकारको ध्यानाकर्षण गराइन्। मन्त्री गौतमले महिला र बालबालिकामाथि हुने यौनजन्य हिंसा तथा साइबर अपराध न्यूनीकरण गर्न नीतिगत सुधारको प्रक्रिया अघि बढाइएको जानकारी दिइन्।
वीरगञ्जका मेयर राजेशमान सिंहविरुद्ध किर्ते मुद्दामा पक्राउ पुर्जी जारी
जिल्ला अदालत पर्साले वीरगञ्ज महानगरपालिकाका मेयर राजेशमान सिंहविरुद्ध लिखतसम्बन्धी कसुर (किर्ते) मुद्दामा पक्राउ पुर्जी जारी गरेको छ। अदालतले प्रहरीलाई अनुसन्धानका लागि पक्राउ गरी अनुसन्धान अघि बढाउन अनुमति दिएको हो। आरोप अनुसार सिंहले नक्कली कागजात प्रयोग गरी अर्काकी छोरीलाई आफ्नो छोरी बनाई नागरिकता जारी गराएको दाबी गरिएको छ।
इन्टरपोलद्वारा १५ नेपालीविरुद्ध मानव तस्करी, आतंकवाद र हत्या अभियोगमा रेड नोटिस जारी
अन्तर्राष्ट्रिय अपराध प्रहरी संगठन (इन्टरपोल) ले अमेरिका, भारत र केन्याको अनुरोधमा मानव तस्करी, आतंकवाद, ठगी, जबर्जस्ती करणी र हत्या जस्ता गम्भीर अपराधमा संलग्न १५ नेपाली नागरिकविरुद्ध विश्वव्यापी खोजी तथा पक्राउका लागि रेड नोटिस जारी गरेको छ। यस सूचीमा मानव तस्करी र अध्यागमन कानुन उल्लंघनको आरोपमा केन्याले खोजी गरिरहेका विक्रान्त थापा र वीरबहादुर मगर तथा आतंकवादी गतिविधि र नक्कली नोट कारोबारमा संलग्न रहेको आरोपमा भारतले खोजी गरिरहेका नूर मोहम्मद अन्सारी जस्ता व्यक्तिहरू समावेश छन्।
सर्वोच्च अदालतले विदेशबाट अनलाइन बयान र वकपत्र गर्न सकिने आदेश दियो
सर्वोच्च अदालतले नेपालमा विचाराधीन मुद्दामा विदेशमा रहेका नेपाली नागरिकलाई दूतावास वा कूटनीतिक निकायमा उपस्थित भई अनलाइनमार्फत बयान र वकपत्र गर्न सकिने आदेश जारी गरेको छ। न्यायाधीशद्वय हरि फुयाल र बालकृष्ण ढकालको संयुक्त इजलासले सूचना प्रविधिको प्रयोग गरी न्याय सम्पादनलाई सहज बनाउन यो निर्णय गरेको हो। यसअघि विशेष अदालतको एउटा इजलासले भ्रष्टाचार मुद्दामा विदेशबाट अनलाइन बयान दिन नसकिने राय दिएको थियो।
रौतहटमा मदिरा सेवन गरी कुटपिट गर्दा युवकको मृत्यु, एक पक्राउ
रौतहटको चन्द्रपुर नगरपालिका–४ मा मदिरा सेवन गरेका विमल मोक्तानले बाटोमा हिँडिरहेका विष्णु सुवेदीलाई कुटपिट गर्दा सुवेदीको मृत्यु भएको छ । घाइते सुवेदीको उपचारका क्रममा मृत्यु भएको हो । प्रहरीले मोक्तानलाई पक्राउ गरी घटनाबारे थप अनुसन्धान गरिरहेको छ ।
