Photo · himalpress.com
पूर्वी अफगानिस्तानमा शनिबार ट्रक पल्टिँदा पाकिस्तानबाट फर्किरहेका अफगान परिवारका १० बालबालिकासहित १८ जनाको मृत्यु भएको छ। लगमान प्रान्तका गभर्नरका प्रवक्ता अब्दुल मलिक नियाजयका अनुसार दुर्घटनामा २९ जना घाइते भएका छन्। पाकिस्तानले अफगान आप्रवासी र शरणार्थीहरूविरुद्ध कडा नियम लागू गरेपछि स्वदेश फर्किनेको संख्या बढेको छ।
तनहुँमा बसको ठक्करबाट पैदलयात्रीको मृत्यु, चालक नियन्त्रणमा
तनहुँको म्याग्दे गाउँपालिका–१ गुणादीस्थित पृथ्वीराजमार्गमा पर्यटक बसको ठक्करबाट ७८ वर्षीय सम्मरबहादुर रानाभाटको मृत्यु भएको छ। पोखराबाट काठमाडौंतर्फ जाँदै गरेको बसले बाटो क्रस गर्ने क्रममा रानाभाटलाई ठक्कर दिएको थियो। दुर्घटनामा संलग्न बस र चालकलाई प्रहरीले नियन्त्रणमा लिएको छ।
सङ्खुवासभामा आगलागी: राजु तामाङको घर जलेर ४ लाखको क्षति
सङ्खुवासभाको धर्मदेवी नगरपालिका–१ पाँचखाल तामाङ टोलमा गए राति राजु तामाङको घरमा आगलागी हुँदा करिब चार लाख बराबरको धनमालको क्षति भएको छ। जिल्ला प्रहरी कार्यालयका अनुसार आगलागीबाट ढुङ्गा, माटो र काठले बनेको एक तले घर पूर्ण रूपमा नष्ट भएको छ। प्रहरी टोली र स्थानीयवासीको सहयोगमा आगो नियन्त्रणमा लिइएको थियो।
सुर्खेतमा टिपरको ठक्करबाट पैदलयात्री कमल वलीको मृत्यु, चालक नियन्त्रणमा
सुर्खेतमा टिपरको ठक्करबाट घाइते भएका २३ वर्षीय पैदलयात्री कमल वलीको उपचारका क्रममा मृत्यु भएको छ। भेरीगङ्गा नगरपालिका-२ कालापानीका वलीलाई बुधबार राति टिपरले ठक्कर दिएको थियो। प्रहरीले घटनामा संलग्न टिपर चालक वीरेन्द्रनगर नगरपालिका-१० का ५२ वर्षीय मानबहादुर चौधरीलाई नियन्त्रणमा लिएर थप अनुसन्धान गरिरहेको छ।
हेटौंडाको रोयल पार्टी प्यालेसमा आगलागी हुँदा करिब २० लाखको क्षति
मकवानपुरको हेटौंडा उपमहानगरपालिका–४ भुटनदेवी मोडस्थित रोयल पार्टी प्यालेसमा करेन्ट सर्ट भई आगलागी हुँदा करिब २० लाख रुपैयाँ बराबरको क्षति भएको छ। जिल्ला प्रहरी कार्यालय मकवानपुरका अनुसार बिहीबार दिउँसो भएको आगलागीलाई प्रहरी, दमकल र स्थानीयवासीको सहयोगमा करिब २० मिनेटमा नियन्त्रणमा लिइएको थियो। घटनामा कुनै मानवीय वा चौपाया क्षति भएको छैन।
