संसद

प्रधानमन्त्री बालेन शाहको संसदमा उपस्थिति र जवाफको माग गर्दै विपक्षी दलहरूले अवरोध जारी राखेपछि मंगलबारको प्रतिनिधिसभा बैठक १५ मिनेटका लागि स्थगित गरिएको छ। राष्ट्रिय स्वतन्त्र पार्टीका सांसद जगदीश खरेलले विपक्षीको विरोधलाई 'तमासा' को संज्ञा दिएपछि सदनमा तनाव उत्पन्न भएको थियो।

राष्ट्रिय प्रजातन्त्र पार्टी (राप्रपा)की प्रमुख सचेतक खुश्बु ओलीले संसदमा सत्तापक्षले विपक्षीलाई नजरअन्दाज गरेको भन्दै आपत्ति जनाएकी छन्। उनले विगतमा सत्तापक्ष आफैं प्रतिपक्ष हुँदा बढी पेलिएको स्मरण गर्दै अहिले सत्तामा पुगेपछि विपक्षीलाई पेलेर अघि बढ्नु सुहाउँदो नभएको टिप्पणी गरिन्। ओलीले प्रतिपक्षी दलहरूको आवाज दबाउन नखोज्न सत्तापक्षलाई चेतावनी दिइन्।

प्रमुख प्रतिपक्षी दल नेपाली कांग्रेस, नेकपा (एमाले), नेकपा, श्रम संस्कृति पार्टी र राष्ट्रिय प्रजातन्त्र पार्टीले प्रधानमन्त्री बालेन्द्र शाह संसद्मा उपस्थित भई सांसदहरूले उठाएका प्रश्नहरूको जवाफ दिनुपर्ने माग गर्दै मंगलबारको प्रतिनिधि सभा बैठक अवरुद्ध पारेका छन्। विपक्षी दलहरूले प्रधानमन्त्रीले सदनलाई बेवास्ता गरेको आरोप लगाएका छन् र उहाँ उपस्थित नभएसम्म अवरोध जारी राख्ने बताएका छन्।

प्रतिनिधिसभाको बैठक आज बिहान ११ बजे बस्ने भएको छ। बैठकमा संस्कृति, पर्यटन तथा नागरिक उड्डयनमन्त्री खडकराज पौडेलले पर्यटन विधेयक, २०८१ माथि विचार गरियोस् भन्ने प्रस्ताव प्रस्तुत गर्नेछन्। साथै, प्रधानमन्त्री वालेन्द्र शाहका तर्फबाट कानुन, न्याय तथा संसदीय मामिलामन्त्री सोविता गौतमले राष्ट्रिय विधि विज्ञान प्रयोगशाला (स्थापना र सञ्चालन) विधेयक, २०८१ लाई दफावार छलफलका लागि सम्बन्धित समितिमा पठाउने प्रस्ताव प्रस्तुत गर्नेछिन्।

प्रतिनिधिसभाको बैठकले निर्वाचनसम्बन्धी दुई विधेयक, 'प्रतिनिधिसभा सदस्य निर्वाचन (पहिलो संशोधन) विधेयक, २०८३' र 'मतदाता नामावली (पहिलो संशोधन) विधेयक, २०८३' सर्वसम्मतिबाट पारित गरेको छ। कानुन, न्याय तथा संसदीय मामिलामन्त्री सोविता गौतमले प्रस्तुत गरेको यी विधेयकहरू गत फागुन २१ गते सम्पन्न निर्वाचनका लागि ल्याइएका अध्यादेशहरूलाई विस्थापन गर्ने उद्देश्यले ल्याइएका हुन्।

प्रतिनिधिसभा बैठकमा कांग्रेस सांसद गीताकुमारी सेन्दाङलाई मर्यादापालकले सभामुखको आदेशबिना बैठक कक्षबाट बाहिर निकालेको विषयमा प्रमुख प्रतिपक्षी दल नेपाली कांग्रेसले विरोध जनाएको छ। कांग्रेस सचेतक निश्कल राईले सभामुखको स्पष्ट आदेशबिना गरिएको यस्तो गतिविधि सह्य नहुने बताएकी छन्। सभामुख डोलप्रसाद अर्यालले भने सांसद सेन्दाङले फोटो खिचेको विषयमा जाँच गर्न निर्देशन दिएको र बाहिर ननिकालेको स्पष्ट पारेका छन्।