Karobar Daily

मुक्तिनाथ विकास बैंकले यस आर्थिक वर्षमा देशभर कक्षा ११ मा अध्ययनरत ४२ जना विद्यार्थीहरूलाई ‘मुक्तिनाथ उत्कृष्ट छात्रवृत्ति’ प्रदान गरेको छ। बैंकले आर्थिक रूपमा विपन्न, जेहेन्दार तथा अवसरबाट वञ्चित विद्यार्थीहरूलाई उच्च शिक्षा हासिल गर्न सहयोग पुर्‍याउने उद्देश्यले यो छात्रवृत्ति अभियान सञ्चालन गरेको जनाएको छ। छात्रवृत्ति पाएका विद्यार्थीहरूले यस सहयोगले आफ्नो शैक्षिक यात्रामा नयाँ आशा र आत्मविश्वास थपिएको बताएका छन्।

सरकारले पेटेन्ट तथा औद्योगिक डिजाइन दर्ताका लागि प्राविधिक परीक्षण प्रक्रियालाई आउटसोर्सिङ गर्ने भएको छ। यसका लागि उद्योग विभागले विज्ञहरूको रोस्टर सूची तयार गर्ने प्रक्रिया अघि बढाएको छ। सरकारी अधिकारीहरूमा प्राविधिक ज्ञान र अनुभवको कमीलाई सम्बोधन गर्न यो कदम चालिएको हो।

सिद्धार्थ बैंकले गण्डकी प्रदेशको तनहुँस्थित १२ सामुदायिक विद्यालयहरूलाई इन्टरएक्टिभ डिस्प्ले स्मार्ट बोर्ड हस्तान्तरण गरेको छ। यस कार्यले १५ सयभन्दा बढी विद्यार्थीलाई आधुनिक तथा गुणस्तरीय शिक्षा प्रदान गर्ने उद्देश्य राखिएको छ।

पर्वतस्थित कारागार कार्यालयको भान्सा घर ब्लक निर्माणमा अनियमितता भएको आरोपमा अख्तियार दुरुपयोग अनुसन्धान आयोगले विशेष अदालतमा दायर गरेको भ्रष्टाचार मुद्दामा सबै आरोपितलाई सफाइ मिलेको छ। अदालतले अनुसन्धान, पेस भएका प्रमाण तथा तथ्यहरूको मूल्यांकनपछि कसुर पुष्टि हुन नसकेको ठहर गर्दै आरोपित कर्मचारी तथा निर्माण व्यवसायीलाई निर्दोष ठहर गरेको हो।

लुम्बिनी प्रदेश सरकारले आर्थिक वर्ष २०८३/८४ को लागि नीति तथा कार्यक्रम प्रदेशसभामा प्रस्तुत गरेको छ। प्रदेश प्रमुख कृष्णबहादुर घर्तीमगरले प्रस्तुत गरेको नीति तथा कार्यक्रममा सुशासन, आर्थिक समृद्धि र प्रशासनिक सुधारलाई प्राथमिकता दिइएको छ। यसअन्तर्गत हाल कायम रहेका १२ मन्त्रालयलाई घटाएर ८ मा झारिने घोषणा गरिएको छ।

आईसीसी विश्वकप लिग–२ अन्तर्गत शुक्रबार भएको खेलमा नेपालले अमेरिकालाई १२२ रनले पराजित गरेको छ। कीर्तिपुरस्थित त्रिवि मैदानमा टस जितेर पहिला बलिङ गरेको अमेरिकाविरुद्ध नेपालले ५० ओभरमा ८ विकेटको क्षतिमा ३१७ रन बनाएको थियो। ३१८ रनको लक्ष्य पछ्याएको अमेरिका ४१ ओभर २ बलमा १९५ रनमा अलआउट भयो।

प्रधानमन्त्री बालेन्द्र शाहले युरोपेली संघ (ईयू) आबद्ध देशका राजदूतहरूसँगको भेटमा नेपाली नागरिकको दैनिक जीवनस्तर उकास्न सरकार प्रतिबद्ध रहेको बताएका छन्। उनले नयाँ सरकार गठन भए पनि नीतिगत निरन्तरता रहने, लोकतान्त्रिक मूल्यमान्यताको संरक्षण र राजनीतिक स्थिरता कायम गरिने स्पष्ट पारे। प्रधानमन्त्री शाहले नेपालले सन्तुलित र व्यावहारिक विदेश नीतिलाई निरन्तरता दिने पनि बताए।

सरकारले बाजुरा र हुम्ला जिल्लाको सीमासम्बन्धी प्राविधिक पक्षको अध्ययन गरी प्रतिवेदन पेस गर्न नापी विभागका उपमहानिर्देशक सुशील डंगोलको संयोजकत्वमा एक समिति गठन गरेको छ। भूमि व्यवस्था, सहकारी, संघीय मामिला तथा सामान्य प्रशासन मन्त्री प्रतिभा रावलको अध्यक्षतामा सिंहदरबारमा बसेको बैठकले यो निर्णय गरेको हो।

नेपाल उद्योग वाणिज्य महासंघ (एफएनसीसीआई) को वरिष्ठ उपाध्यक्षमा सुरकृष्ण वैद्य र कोषाध्यक्षमा मनिषलाल प्रधान निर्वाचित भएका छन्। शुक्रबार सम्पन्न निर्वाचनमा वैद्यले ५६ मत प्राप्त गर्दै रामचन्द्र संघईलाई ३० मतले पराजित गरे भने प्रधानले ६१ मत प्राप्त गरी अम्बिकाप्रसाद पौडेललाई २५ मतले हराए।

नेपाल राष्ट्र बैंकले बैंक तथा वित्तीय संस्थाहरूलाई ज्येष्ठ नागरिक, अपाङ्गता भएका व्यक्ति र साक्षर नभएका ग्राहकहरूलाई बैंकिङ सेवामा विशेष प्राथमिकता दिन निर्देशन दिएको छ। यस निर्देशनअनुसार, यी वर्गका ग्राहकहरूलाई सहज बैंकिङ सुविधा उपलब्ध गराउन विशेष काउन्टर तोक्नुपर्नेछ र प्रत्येक स्थानीय तहमा कम्तीमा एक शाखा अपाङ्गमैत्री बनाउनुपर्नेछ।