पहिचान

नेपाल प्रेस युनियनले पत्रकारहरूलाई कृत्रिम बुद्धिमत्ता (एआई), तथ्य परीक्षण, साइबर सुरक्षा र डिजिटल दक्षतासम्बन्धी तालिम प्रदान गर्ने भएको छ। युनियनको विधान सभाले डिजिटल पत्रकारिता र नयाँ प्रविधिमैत्री पत्रकारिता विकासलाई प्राथमिकतामा राख्दै नौ बुँदे घोषणापत्र जारी गरेको छ। यसका साथै, न्यु मिडियामा कार्यरत पत्रकार, युट्युबर, पोडकास्टर र डिजिटल कन्टेन्ट क्रिएटरलाई व्यावसायिक पत्रकारितासँग जोड्ने निर्णय पनि गरेको छ।

सहकारी क्षेत्रमा वित्तीय अनियमितता, बचतकर्ताको रकम दुरुपयोग र कमजोर नियमनका कारण जनविश्वास गुमेको निष्कर्ष 'सहकारीमा भएको बेथिति जाँचबुझ आयोग, २०८२' को प्रतिवेदनले निकालेको छ। प्रतिवेदन सार्वजनिक गर्दै मन्त्री प्रतिभा रावलले सहकारी क्षेत्र सुधारका लागि नीतिगत, संस्थागत र व्यवहारगत सुधारलाई तीव्रता दिने प्रतिबद्धता जनाएकी छिन्।

सरकारले बाजुरा र हुम्ला जिल्लाको सीमासम्बन्धी प्राविधिक पक्षको अध्ययन गरी प्रतिवेदन पेस गर्न नापी विभागका उपमहानिर्देशक सुशील डंगोलको संयोजकत्वमा एक समिति गठन गरेको छ। भूमि व्यवस्था, सहकारी, संघीय मामिला तथा सामान्य प्रशासन मन्त्री प्रतिभा रावलको अध्यक्षतामा सिंहदरबारमा बसेको बैठकले यो निर्णय गरेको हो।

राष्ट्रिय स्वतन्त्र पार्टी (रास्वपा)को बारा जिल्लाको विस्तारित बैठकमा विवाद हुँदा केही सांसदहरूलाई कार्यकर्ताले बैठकस्थलबाट लखेटेको समाचार छ। सांसदहरूले संस्थापक पक्षलाई दबाबमा पार्न खोजेपछि विवाद चर्किएको र आक्रोशित कार्यकर्ताले उनीहरूलाई बाहिर निकालेको बताइएको छ। यद्यपि, सांसद रहबर अन्सारीले भने सामान्य विवाद मात्र भएको र सांसदहरूलाई लखेटिएको भन्ने कुरा अतिरञ्जित भएको दाबी गरेका छन्।

काठमाडौँ महानगरपालिका सहकारी विभागको रोहवरमा बुद्ध दर्शन सेभिङ एन्ड क्रेडिट कोअपरेटिभ लिमिटेडले ३४ जना बचतकर्ताको बचत रकम फिर्ता गरेको छ। सहकारीले आगामी एक महिनाभित्र पाँच लाख रुपैयाँसम्म बचत गर्ने बचतकर्ताको रकम फिर्ता दिने योजना बनाएको छ। विभागले बचत फिर्ता र ऋण असुली दुवै प्रक्रियामा सहजीकरण गरिरहेको छ।

राष्ट्रिय स्वतन्त्र पार्टी (रास्वपा) का सभापति रवि लामिछाने भारतीय विदेश मन्त्रालयको निमन्त्रणामा जेठ १८ देखि भारतको औपचारिक भ्रमणमा जाँदैछन्। भ्रमणका क्रममा उनले भारतीय प्रधानमन्त्री नरेन्द्र मोदी, विदेशमन्त्री एस जयशंकर लगायत उच्च अधिकारीहरूसँग भेटवार्ता गर्ने कार्यक्रम छ। यद्यपि, सरकारका प्रवक्ता सस्मित पोखरेलले रास्वपा सभापतिको भारत भ्रमणबारे आफूहरूलाई कुनै जानकारी नभएको र यसको प्रधानमन्त्रीसँग कुनै सम्बन्ध नरहेको बताएका छन्।

अमेरिकाको कोलोराडोमा आयोजित तीन दिने नवौँ अन्तर्राष्ट्रिय नेपाली साहित्य सम्मेलन ‘कोलोराडो घोषणापत्र’ जारी गर्दै सम्पन्न भएको छ। अन्तर्राष्ट्रिय नेपाली साहित्य समाज (अनेसास) द्वारा आयोजित यस सम्मेलनमा विश्व साहित्यमा नेपाली साहित्यको प्रवर्द्धन, युवा लेखकलाई प्रोत्साहन र लेखन प्रशिक्षण सञ्चालन जस्ता बुँदाहरू समेटिएका छन्। सम्मेलनमा ९ जना महिला साहित्यकारलाई ‘अनेसास नवरत्न साहित्य सम्मान तथा पुरस्कार’ पनि वितरण गरियो।