काठमाडौंको गोङ्गबुबाट एसएलआरको म्याग्जिन र गोलीसहित दुई पक्राउ

सर्वोच्च अदालतले नेपालमा चलिरहेका मुद्दामा विदेशबाट अनलाइनमार्फत बयान र वकपत्र गराउन सकिने आदेश जारी गरेको छ। न्यायाधीशद्वय हरि फुयाल र बालकृष्ण ढकालको संयुक्त इजलासले सूचना प्रविधिको प्रयोगले न्याय सम्पादनलाई सहज बनाउन यो निर्णय गरेको हो। यसअघि विशेष अदालतको एउटा इजलासले भ्रष्टाचार मुद्दामा विदेशबाट अनलाइन बयान दिन नसकिने राय दिएको थियो।

सिन्धुलीको इलाका प्रहरी कार्यालय खुर्कोटको हिरासत कक्षमा थुनुवा श्रीकृष्ण विकको मृत्यु भएको घटनामा प्रहरी उपरीक्षकदेखि प्रहरी जवानसम्म १० जनालाई कारबाहीको सिफारिस गरिएको छ। प्रहरी नायब महानिरीक्षक दिनेशकुमार आचार्य नेतृत्वको छानबिन समितिले हिरासत व्यवस्थापन र निगरानीमा कमजोरी देखिएको निष्कर्ष निकाल्दै प्रतिवेदन बुझाएको छ।

जिल्ला अदालत पर्साले वीरगञ्ज महानगरपालिकाका मेयर राजेशमान सिंहविरुद्ध लिखतसम्बन्धी कसुर (किर्ते) मुद्दामा पक्राउ पुर्जी जारी गरेको छ। अदालतले प्रहरीलाई अनुसन्धानका लागि पक्राउ गरी अनुसन्धान अघि बढाउन अनुमति दिएको हो। आरोप अनुसार सिंहले नक्कली कागजात प्रयोग गरी अर्काकी छोरीलाई आफ्नो छोरी बनाई नागरिकता जारी गराएको दाबी गरिएको छ।

अन्तर्राष्ट्रिय अपराध प्रहरी संगठन (इन्टरपोल) ले अमेरिका, भारत र केन्याको अनुरोधमा मानव तस्करी, आतंकवाद, ठगी, जबर्जस्ती करणी र हत्या जस्ता गम्भीर अपराधमा संलग्न १५ नेपाली नागरिकविरुद्ध विश्वव्यापी खोजी तथा पक्राउका लागि रेड नोटिस जारी गरेको छ। यस सूचीमा मानव तस्करी र अध्यागमन कानुन उल्लंघनको आरोपमा केन्याले खोजी गरिरहेका विक्रान्त थापा र वीरबहादुर मगर तथा आतंकवादी गतिविधि र नक्कली नोट कारोबारमा संलग्न रहेको आरोपमा भारतले खोजी गरिरहेका नूर मोहम्मद अन्सारी जस्ता व्यक्तिहरू समावेश छन्।