देउवा समूह र इतर पक्षका नेताहरू एउटै मञ्चमा

नेपाली कांग्रेस सुदूरपश्चिम प्रदेश कार्यसमितिको आयोजनामा धनगढीस्थित सौराई स्क्वायरमा प्रदेशस्तरीय बृहत् भेला सुरु भएको छ । 'नेपाली कांग्रेसको बृहत्तर एकता र पुनर्जागरणका लागि सुदूरपश्चिम प्रदेशस्तरीय भेला' शीर्षकको मुख्य ब्यानरमुनि आयोजित यस विशेष कार्यक्रमको अध्यक्षता प्रदेश सभापति वीरबहादुर बलायरले गरेका छन् । यसअघि अन्य प्रदेशका नेताहरूलाई आमन्त्रण नगरिने भनिए तापनि भेलामा विभिन्न प्रदेशका शीर्ष तथा प्रभावशाली नेताहरूको समेत बाक्लो उपस्थिति देखिएको छ। उक्त महत्त्वपूर्ण भेलामा नेपाली कांग्रेसका केन्द्रीय नेताहरू रमेश लेखक, एनपी साउद, वीरबहादुर बलायर, मोहन बस्नेत र केदार कार्कीलगायतको सहभागिता रहेको छ। यसैगरी, सुदूरपश्चिम प्रदेश सरकारका मुख्यमन्त्री कमलबहादुर शाह, आर्थिक मामिला मन्त्री बहादुरसिंह थापा, उद्योग, पर्यटन, वन तथा वातावरण मन्त्री शिवराज भट्ट, सामाजिक विकास मन्त्री मेघराज खड्का तथा राष्ट्रियसभा सदस्य एवं कांग्रेस कैलालीका जिल्ला सभापति नारायणदत्त भट्ट लगायतका प्रादेशिक नेतृत्वको कार्यशालामा बलियो उपस्थिति छ। यसअघि कांग्रेस महामन्त्री गगन थापाको उपस्थितिमा सुदूरपश्चिममा आयोजना गरिएको प्रदेशस्तरीय भेलालाई प्रदेश सभापति वीरबहादुर बलायर र कैलाली जिल्ला सभापति नारायणदत्त भट्ट लगायतका संस्थापन पक्षका नेताहरूले बहिष्कार गरेका थिए। तर, शनिबार आयोजित यस भेलामा भने पार्टी सभापति शेरबहादुर देउवा समूह (संस्थापन पक्ष) र इतर समूह दुवै पक्षका नेता–कार्यकर्ताहरूको उल्लेख्य एवं उत्साहजनक सहभागिता देखिएको छ। कार्यक्रममा बोल्ने अधिकांश वक्ताहरूले आफूहरू कुनै पनि हालतमा पार्टी विभाजनको पक्षमा नरहेको स्पष्ट पारेका छन्। उनीहरूले कांग्रेस नेतृत्वले सबै विचार र पक्षलाई सम्मानपूर्वक समेटेर लैजानुपर्ने धारणा राख्दै पार्टीभित्र आन्तरिक संवाद, सहकार्य र बलियो एकताको अपरिहार्यता औंल्याएका छन्।