Shilapatra

सिद्धार्थ राजमार्गअन्तर्गत बुटवल–पाल्पा सडकखण्डमा निर्माणाधीन सुरुङमार्ग आगामी असोजदेखि सञ्चालनमा ल्याउने लक्ष्यसहित निर्माण कार्य तीव्र पारिएको छ। आयोजनाका अनुसार सुरुङमार्गको हालसम्म भौतिक प्रगति ६८ प्रतिशत र वित्तीय प्रगति ५८ प्रतिशत पुगेको छ। आयोजना प्रमुख राजेश पौडेलले सुरुङमार्गमार्फत आगामी असोजसम्म यातायात सञ्चालन गर्ने लक्ष्यअनुसार कामलाई तीव्रता दिइएको जानकारी दिएका छन्।

प्रतिनिधिसभा बैठकमा कांग्रेस सांसद गीताकुमारी सेन्दाङलाई मर्यादापालकले सभामुखको आदेशबिना बैठक कक्षबाट बाहिर निकालेको विषयमा प्रमुख प्रतिपक्षी दल नेपाली कांग्रेसले विरोध जनाएको छ। कांग्रेस सचेतक निश्कल राईले सभामुखको स्पष्ट आदेशबिना गरिएको यस्तो गतिविधि सह्य नहुने बताएकी छन्। सभामुख डोलप्रसाद अर्यालले भने सांसद सेन्दाङले फोटो खिचेको विषयमा जाँच गर्न निर्देशन दिएको र बाहिर ननिकालेको स्पष्ट पारेका छन्।

परिवर्तन अभियान नेपालले तारकेश्वर नगरपालिकामा एसईई परीक्षा उत्तीर्ण विद्यार्थीहरूको सम्मानमा आयोजना गरेको कार्यक्रममा विभिन्न राजनीतिक दलका नेताहरूले अनुशासन र नैतिक मूल्य मान्यतालाई वर्तमान समाजको आवश्यकता बताएका छन्। नेपाली कांग्रेसका नेता अर्जुननरसिंह केसीले विद्यार्थीहरूलाई सामाजिक मूल्यका बारेमा जानकारी दिनुका साथै अनुशासनमा राख्नुपर्नेमा जोड दिए। कार्यक्रममा विद्यार्थीहरूलाई निःशुल्क शैक्षिक परामर्श र छात्रवृत्तिको व्यवस्था मिलाउने प्रतिबद्धता पनि व्यक्त गरियो।

तनहुँको दमौलीस्थित सफा सडक क्षेत्रमा आजदेखि लागू गरिएको पार्किङ निषेधको निर्णयविरुद्ध स्थानीय व्यवसायीहरूले पसल बन्द गरेर विरोध प्रदर्शन गरेका छन्। व्यास नगरपालिकाले ट्राफिक व्यवस्थापनलाई व्यवस्थित बनाउने उद्देश्यले यो निर्णय गरेको जनाएको छ, तर व्यवसायीहरूले यसले व्यापारमा प्रत्यक्ष असर पर्ने भन्दै निर्णय पुनर्विचार गर्न माग गरेका छन्।

बागमती प्रदेश सरकारले आगामी आर्थिक वर्ष २०८३/८४ को नीति तथा कार्यक्रम प्रदेश प्रमुख दीपकप्रसाद देवकोटा मार्फत प्रदेशसभामा प्रस्तुत गरेको छ। सरकारले पूर्वाधार विकास, कृषि, पर्यटन, शिक्षा, स्वास्थ्य, रोजगारी सिर्जना, वातावरण संरक्षण तथा सुशासनलाई प्राथमिकतामा राखेको जनाएको छ।

जनकपुरधामको प्रादेशिक अस्पतालमा उपचारका क्रममा २६ वर्षीया सुत्केरी अञ्जिना यादवको मृत्यु भएपछि उच्चस्तरीय छानबिन समिति गठन गर्ने निर्णय भएको छ। मृतकका परिवारजनले चिकित्सकको लापरवाहीले मृत्यु भएको आरोप लगाएका छन्। यस प्रकरणमा राष्ट्रिय स्वतन्त्र पार्टीका सांसद रामविनोद यादवले पनि छानबिनको माग गरेका छन्।

लुम्बिनी प्रदेश सरकारले आर्थिक वर्ष २०८३/८४ को लागि नीति तथा कार्यक्रम प्रदेशसभामा प्रस्तुत गरेको छ। प्रदेश प्रमुख कृष्णबहादुर घर्तीमगरले प्रस्तुत गरेको नीति तथा कार्यक्रममा सुशासन, आर्थिक समृद्धि र प्रशासनिक सुधारलाई प्राथमिकता दिइएको छ। यसअन्तर्गत हाल कायम रहेका १२ मन्त्रालयलाई घटाएर ८ मा झारिने घोषणा गरिएको छ।

आईसीसी विश्वकप लिग–२ अन्तर्गत शुक्रबार भएको खेलमा नेपालले अमेरिकालाई १२२ रनले पराजित गरेको छ। कीर्तिपुरस्थित त्रिवि मैदानमा टस जितेर पहिला बलिङ गरेको अमेरिकाविरुद्ध नेपालले ५० ओभरमा ८ विकेटको क्षतिमा ३१७ रन बनाएको थियो। ३१८ रनको लक्ष्य पछ्याएको अमेरिका ४१ ओभर २ बलमा १९५ रनमा अलआउट भयो।

प्रधानमन्त्री बालेन्द्र शाहले मंगलबार यहाँस्थित युरोपेली संघ (ईयू)मा आबद्ध देशका गैरआवासीय राजदूत तथा मिसन प्रमुखहरूसँग संयुक्त भेटवार्ता गरेका छन्। प्रधानमन्त्री तथा मन्त्रिपरिषद्को कार्यालयमा भएको उक्त भेटमा नेपालको वर्तमान प्राथमिकता, द्विपक्षीय सम्बन्ध सुदृढ तुल्याउने र सहकार्यका विविध विषयमा छलफल केन्द्रित भएको थियो।

प्रधानमन्त्री बालेन्द्र शाहले युरोपेली संघ (ईयू) आबद्ध देशका राजदूतहरूसँगको भेटमा नेपाली नागरिकको दैनिक जीवनस्तर उकास्न सरकार प्रतिबद्ध रहेको बताएका छन्। उनले नयाँ सरकार गठन भए पनि नीतिगत निरन्तरता रहने, लोकतान्त्रिक मूल्यमान्यताको संरक्षण र राजनीतिक स्थिरता कायम गरिने स्पष्ट पारे। प्रधानमन्त्री शाहले नेपालले सन्तुलित र व्यावहारिक विदेश नीतिलाई निरन्तरता दिने पनि बताए।

नेकपा एमालेको केन्द्रीय सचिवालय बैठकमा अधिकांश सदस्यहरूले अध्यक्ष केपी शर्मा ओलीलाई नेतृत्व हस्तान्तरण गरी पार्टी पुनर्गठन गर्न सुझाव दिएका छन्। शुक्रबारदेखि जारी बैठकमा उपाध्यक्षहरू, महासचिव, उपमहासचिव र सचिवहरूले आ-आफ्नो धारणा राखेका छन्। आजको बैठकमा अध्यक्ष ओलीले नेताहरूले उठाएका प्रश्नहरूको जवाफ दिने कार्यक्रम छ।

काठमाडौं उपत्यकाबाट बाहिरिने लामो दूरीका सार्वजनिक सवारी साधनमा यात्रुको सामान सुरक्षित बनाउन र हराउने वा साटिने समस्या अन्त्य गर्नका लागि ‘लगेज ट्याग’ प्रणाली लागू गरिने भएको छ। यसका लागि काठमाडौं उपत्यका ट्राफिक प्रहरी कार्यालय र राष्ट्रिय यातायात व्यवसायी महासंघबीच सम्झौता भएको छ। यो प्रणाली आगामी जेठ १५ गतेदेखि लागू हुनेछ।