Photo · www.setopati.com
कञ्चनपुरको पुनर्वास क्षेत्रमा दोदा नदी र बाहुन खोलामा आएको आकस्मिक बाढीमा फसेका २० जना महिलालाई सशस्त्र प्रहरी बलले सकुशल उद्धार गरेको छ। पुनर्वास नगरपालिका-९ मा निउरो टिप्न गएका पाँच महिला दोदा नदीमा र दाउराघाँस गर्न गएका १५ महिला बाहुन खोलामा पानीको बहाव बढेपछि अलपत्र परेका थिए। सशस्त्र प्रहरीको विपद् व्यवस्थापन तालिम प्राप्त टोलीले स्थानीय प्रहरी, जनप्रतिनिधि र स्थानीयवासीको सहयोगमा उनीहरूको उद्धार गरेको हो।
सुर्खेतमा टिपरको ठक्करबाट पैदलयात्री कमल वलीको मृत्यु, चालक नियन्त्रणमा
सुर्खेतमा टिपरको ठक्करबाट घाइते भएका २३ वर्षीय पैदलयात्री कमल वलीको उपचारका क्रममा मृत्यु भएको छ। भेरीगङ्गा नगरपालिका-२ कालापानीका वलीलाई बुधबार राति टिपरले ठक्कर दिएको थियो। प्रहरीले घटनामा संलग्न टिपर चालक वीरेन्द्रनगर नगरपालिका-१० का ५२ वर्षीय मानबहादुर चौधरीलाई नियन्त्रणमा लिएर थप अनुसन्धान गरिरहेको छ।
सङ्खुवासभामा आगलागी: राजु तामाङको घर जलेर ४ लाखको क्षति
सङ्खुवासभाको धर्मदेवी नगरपालिका–१ पाँचखाल तामाङ टोलमा गए राति स्थानीय राजु तामाङको घरमा आगलागी हुँदा करिब चार लाख बराबरको धनमाल जलेर नष्ट भएको छ। जिल्ला प्रहरी कार्यालयका अनुसार आगलागीबाट अन्नपात, लत्ताकपडा र महत्त्वपूर्ण कागजातसमेत जलेका छन्। प्रहरी र स्थानीयवासीको सहयोगमा आगो नियन्त्रणमा लिइएको थियो।
हेटौंडाको रोयल पार्टी प्यालेसमा आगलागी हुँदा करिब २० लाखको क्षति
मकवानपुरको हेटौंडा उपमहानगरपालिका–४ भुटनदेवी मोडस्थित रोयल पार्टी प्यालेसमा करेन्ट सर्ट भई आगलागी हुँदा करिब २० लाख रुपैयाँ बराबरको क्षति भएको छ। जिल्ला प्रहरी कार्यालय मकवानपुरका अनुसार बिहीबार दिउँसो भएको आगलागीलाई प्रहरी, दमकल र स्थानीयवासीको सहयोगमा करिब २० मिनेटमा नियन्त्रणमा लिइएको थियो। घटनामा कुनै मानवीय वा चौपाया क्षति भएको छैन।
भारतमा प्रि-मनसुनले ४८ को मृत्यु, कोशी प्रदेशमा बर्खाको त्रास
भारतका १५ भन्दा बढी राज्यहरूमा प्रि-मनसुन वर्षा, आँधीबेहरी र चट्याङका कारण ४८ जनाको मृत्यु भएको छ, जसमा बिहार र उत्तर प्रदेशमा सबैभन्दा बढी क्षति भएको छ। यसैबीच, कोशी प्रदेशका राजमार्गहरूमा बर्खाको समयमा पहिरो र बाढीका कारण सडक अवरुद्ध हुँदा यात्रुहरूले सास्ती भोगिरहेका छन्।
