बारा

मधेश प्रदेशमा बैंक तथा वित्तीय संस्थाहरूको कुल निक्षेप २०.९० प्रतिशतले वृद्धि भई ४ खर्ब २७ अर्ब २७ करोड रूपैयाँ पुगेको छ । सोही अवधिमा कर्जा प्रवाह २.१७ प्रतिशतले बढेर ५ खर्ब ७ करोड रूपैयाँ पुगेको छ । निक्षेप परिचालन र कर्जा प्रवाहको आँकडालाई तुलना गर्दा अन्य प्रदेशहरूमा संकलन भएको वित्तीय स्रोत मधेश प्रदेशमा स्थानान्तरण भई त्यसको उपयोग भएको देखिएको छ ।

जिल्ला प्रहरी कार्यालय बारामा कार्यरत प्रहरी निरीक्षक सुरेशराज भट्टमाथि पीडितलाई दुःख दिने र गैरव्यावसायिक आचरण गरेको गम्भीर आरोप लागेको छ। फुलचन रामको परिवारमाथि भएको सामूहिक कुटपिटको घटनामा दोषीलाई कारबाही नगरी पीडितलाई हिरासतमा राखेको र प्रदीप जैसवालमाथि भएको कुटपिट घटनामा पीडकलाई पक्राउ नगरेको जस्ता आरोपहरू प्रहरी निरीक्षक भट्टमाथि लागेका छन्। महिला अधिकारकर्मी सरस्वती सिंहका अनुसार बालिका हराएको घटनामा परिवारले जाहेरी दिँदा प्रहरीले संवेदनशीलता नदेखाएको र उल्टै दबाब दिएको थियो।

राष्ट्रिय स्वतन्त्र पार्टी (रास्वपा) ले बारा जिल्ला सभापति चन्दन स्वर्णकारको पार्टी सदस्यता खारेज गरी निष्कासन गरेको छ। बाराबाट निर्वाचित चार सांसदले आर्थिक अनियमितता, पार्टी संगठन परिचालन नगरेको र विपक्षी दलको पक्षमा लागेको आरोप लगाउँदै अनुशासन आयोगमा उजुरी दिएपछि पार्टीले यो कारबाही गरेको हो। स्वर्णकारले भने आफूमाथि राजनीतिक हत्या भएको र सांसदहरूको दबाबमा बिना छानबिन कारबाही गरिएको दाबी गरेका छन्।

जिल्ला प्रहरी कार्यालय चितवनले सात वर्षअघि फरार रहेका पन्चदेव महरालाई बाराको फेटा गाउँपालिकाबाट पक्राउ गरेको छ। उनी २०७६ चैत २३ गते खैरहनी नगरपालिका–९ स्थित नेपाल ग्यास उद्योगको कम्पाउण्डभित्र भएको हत्या घटनामा संलग्न रहेको आरोपमा पक्राउ परेका हुन्। पक्राउ परेका महरालाई जिल्ला अदालतबाट म्याद थप गरी अनुसन्धान सुरु गरिएको छ।