Nepali Link

ईरानले विश्वको एक संवेदनशील समुद्री व्यापार मार्ग, स्ट्रेट अफ हर्मुजमा आफ्नो नियन्त्रण कडा पार्ने क्रममा नयाँ व्यवस्थापन तथा अनुगमन क्षेत्रको सीमा निर्धारण गरेको छ। नयाँ गठन गरिएको पर्सियन गल्फ स्ट्रेट अथोरिटी (पिजिएसए) ले अब यस जलमार्गबाट यात्रा गर्ने जहाजहरूले अनिवार्य रूपमा समन्वय र अनुमति लिनुपर्ने व्यवस्था लागू गरेको छ। यो कदम अमेरिका र इरानबीच जारी वार्तामा प्रगति नभइरहेका बेला आएको हो।

अमेरिका-इजरायलले इरानमाथि हवाई आक्रमण गरेपछि मध्यपूर्वमा जारी तनावका बाबजुद यस वर्ष हज यात्रामा आउने इस्लाम धर्मावलम्बीको सङ्ख्या गत वर्षको तुलनामा बढी देखिएको छ। साउदी अधिकारीका अनुसार आगामी हजका लागि साउदी अरब बाहिरबाट १५ लाखभन्दा बढी तीर्थयात्री आइपुगेका छन्।

बेलायतमा हरेक वर्ष आयोजना हुने १३ औं ग्रीनवीचकप फुटबल प्रतियोगिता मे ३० तारिख शनिबार साउथ इष्ट लन्डनको चार्ल्टनस्थित ‘मेरिडियन स्पोर्टस् एन्ड सोसल क्लब’ को मैदानमा सञ्चालन हुनेछ। यस वर्षको प्रतियोगितामा सहभागी टीम संख्या र पुरस्कार राशि दुवै बढाइएको छ।

प्रधानमन्त्री बालेन्द्र शाहले मंगलबार यहाँस्थित युरोपेली संघ (ईयू)मा आबद्ध देशका गैरआवासीय राजदूत तथा मिसन प्रमुखहरूसँग संयुक्त भेटवार्ता गरेका छन्। प्रधानमन्त्री तथा मन्त्रिपरिषद्को कार्यालयमा भएको उक्त भेटमा नेपालको वर्तमान प्राथमिकता, द्विपक्षीय सम्बन्ध सुदृढ तुल्याउने र सहकार्यका विविध विषयमा छलफल केन्द्रित भएको थियो।

प्रधानमन्त्री बालेन्द्र शाहले युरोपेली संघ (ईयू) आबद्ध देशका राजदूतहरूसँगको भेटमा नेपाली नागरिकको दैनिक जीवनस्तर उकास्न सरकार प्रतिबद्ध रहेको बताएका छन्। उनले नयाँ सरकार गठन भए पनि नीतिगत निरन्तरता रहने, लोकतान्त्रिक मूल्यमान्यताको संरक्षण र राजनीतिक स्थिरता कायम गरिने स्पष्ट पारे। प्रधानमन्त्री शाहले नेपालले सन्तुलित र व्यावहारिक विदेश नीतिलाई निरन्तरता दिने पनि बताए।

अविरल वर्षापछि गए राति पाँचथरको याङवरक गाउँपालिकामा आएको बाढीपहिरोले घरगोठ, सडक, झोलुङ्गे पुल र जलविद्युत् आयोजनामा ठूलो क्षति पुर्‍याएको छ। याङवरक गाउँपालिकाका उपाध्यक्ष बाबा मेन्याङ्बोका अनुसार हालसम्म दुई वटा घर र तीन वटा झोलुङ्गे पुल बगाएको छ। मानवीय क्षतिको विवरण नआएको र वर्षा रोकिएको छ।

संयुक्त अधिराज्य (बेलायत) की इन्डो–प्यासिफिक राज्यमन्त्री सीमा मल्होत्राले नेपाल भ्रमणका क्रममा शिक्षा, सीप विकास र आर्थिक सहकार्यलाई दुई देशबीचको सम्बन्ध सुदृढ पार्ने मुख्य आधार बताएकी छिन्। आफ्नो पहिलो नेपाल भ्रमणमा उनले २०० वर्षभन्दा पुरानो मित्रता र मैत्री सन्धि नयाँ उचाइमा पुर्‍याउने प्रतिबद्धता व्यक्त गरिन्।

अमेरिकाको कोलोराडोमा आयोजित तीन दिने नवौँ अन्तर्राष्ट्रिय नेपाली साहित्य सम्मेलन ‘कोलोराडो घोषणापत्र’ जारी गर्दै सम्पन्न भएको छ। अन्तर्राष्ट्रिय नेपाली साहित्य समाज (अनेसास) द्वारा आयोजित यस सम्मेलनमा विश्व साहित्यमा नेपाली साहित्यको प्रवर्द्धन, युवा लेखकलाई प्रोत्साहन र लेखन प्रशिक्षण सञ्चालन जस्ता बुँदाहरू समेटिएका छन्। सम्मेलनमा ९ जना महिला साहित्यकारलाई ‘अनेसास नवरत्न साहित्य सम्मान तथा पुरस्कार’ पनि वितरण गरियो।

चीनको ग्वाङ्झाउमा आयोजित अन्तर्राष्ट्रिय पर्यटन मेलामा नेपाललाई ‘मोस्ट चार्मिङ टुरिज्म डेस्टिनेसन’ अर्थात् ‘सबैभन्दा आकर्षक पर्यटकीय गन्तव्य’को सम्मान प्रदान गरिएको छ । नेपालको प्राकृतिक सौन्दर्य, आध्यात्मिकता, सांस्कृतिक विविधता र साहसिक पर्यटनको आकर्षणका आधारमा यो सम्मान दिइएको नेपाल पर्यटन बोर्डले जनाएको छ । यसले चीनको पर्यटन बजारमा नेपालको प्रवर्द्धनमा सहयोग पुग्ने विश्वास गरिएको छ ।