Sansar News

ताप्लेजुङको ओलाङचुङ्गोला टिप्ताला नाका कर्मचारी व्यवस्थापनपछि पुनः सञ्चालनमा आएको छ। कोभिड-१९ महामारीका कारण बन्द रहेको यो नाका अहिले नियमित सञ्चालनमा ल्याइएको हो। नायब सुब्बा प्रदीप धिताललाई प्रमुख तोकिएसँगै नाका सञ्चालनमा आएको छ।

मकवानपुरमा भएका दुई छुट्टाछुट्टै घटनामा दुई जनाको मृत्यु भएको छ। हेटौँडा उपमहानगरपालिकामा श्रीमानको कुटपिटबाट एक महिलाको मृत्यु भएको छ भने भीमफेदी गाउँपालिकामा निर्माणाधीन द्रुतमार्गको सुरुङमा काम गर्ने एक कामदारको उपकरण खसेर मृत्यु भएको छ।

नेपाली कांग्रेसले पार्टीको निर्वाचन ब्युरोमा १७ सदस्य मनोनयन गरेको छ। पार्टी सभापति गगनकुमार थापाले उपसभापति पुष्पा भुसालको संयोजकत्वमा गठित ब्युरोमा यी सदस्यहरूलाई मनोनयन गरेका हुन्। ब्युरोलाई पार्टीको देशव्यापी निर्वाचनका लागि डाटाबेस निर्माण गर्ने र निर्वाचन तयारीलाई वैज्ञानिक बनाउने लक्ष्यसहित कार्यादेश दिइएको छ।

म्याग्दीको अन्नपूर्ण गाउँपालिका–४ मा रहेको नारच्याङ लेकगाउँलाई परम्परागत मगर जीवनशैली र संस्कृतिको जगेर्ना गर्ने स्थलका रूपमा ‘मगर सङ्ग्रहालय’ को पहिचान दिइएको छ। वडा सदस्य श्याम पुर्जाका अनुसार, सयौँ वर्ष पुराना ढुङ्गे घरहरू र स्थानीय परम्पराले यस गाउँलाई सांस्कृतिक अध्ययनको केन्द्र बनाएको छ।

टीकापुरमा गोबरबाट विभिन्न सजावटका सामग्री उत्पादनसम्बन्धी सीपमूलक तथा आयआर्जनमूलक नौदिने तालिम सुरु भएको छ। टीकापुर नगरपालिकाको सहयोगमा सामुदायिक पशु–चौपाया व्यवस्थापन तथा प्रवद्र्धन समितिले आयोजना गरेको यस तालिममा ५० जना महिला सहभागी छन्। प्रतिनिधिसभा सदस्य कोमल ज्ञवालीले गोबरको प्रयोगबाट महिलालाई आर्थिक आत्मनिर्भर बनाउन सकिने बताएकी छन्।

दाङको घोराहीमा साहित्यकार शरद गौतमद्वारा रचित मुक्तक सङ्ग्रह ‘भावनाका लहर’को विमोचन गरिएको छ। राप्ती साहित्य परिषद्, जिल्ला शाखा दाङको आयोजनामा पत्रकार महासङ्घ दाङको सभाहलमा सम्पन्न कार्यक्रममा वरिष्ठ साहित्यकार उत्तमकृष्ण मजगैया प्रमुख अतिथि थिए। समीक्षक डा. हिमलाल पन्थीले कृतिले समसामयिक समाजको यथार्थ, सामाजिक विकृति र पारिवारिक विखण्डनले निम्त्याएको मानसिक तनावलाई मार्मिक ढङ्गले उजागर गरेको बताए।

प्रधानमन्त्री बालेन्द्र शाहले मंगलबार यहाँस्थित युरोपेली संघ (ईयू)मा आबद्ध देशका गैरआवासीय राजदूत तथा मिसन प्रमुखहरूसँग संयुक्त भेटवार्ता गरेका छन्। प्रधानमन्त्री तथा मन्त्रिपरिषद्को कार्यालयमा भएको उक्त भेटमा नेपालको वर्तमान प्राथमिकता, द्विपक्षीय सम्बन्ध सुदृढ तुल्याउने र सहकार्यका विविध विषयमा छलफल केन्द्रित भएको थियो।

काठमाडौं उपत्यकाबाट बाहिरिने लामो दूरीका सार्वजनिक सवारी साधनमा यात्रुको सामान सुरक्षित बनाउन र हराउने वा साटिने समस्या अन्त्य गर्नका लागि ‘लगेज ट्याग’ प्रणाली लागू गरिने भएको छ। यसका लागि काठमाडौं उपत्यका ट्राफिक प्रहरी कार्यालय र राष्ट्रिय यातायात व्यवसायी महासंघबीच सम्झौता भएको छ। यो प्रणाली आगामी जेठ १५ गतेदेखि लागू हुनेछ।

नेकपा (एमाले) को केन्द्रीय सचिवालय बैठकमा अध्यक्ष केपी शर्मा ओलीमाथि पार्टी पुनर्गठन र नेतृत्व हस्तान्तरणका लागि राजीनामा दिन दबाब बढेको छ। शुक्रबार र शनिबार बसेको बैठकमा उपाध्यक्षहरू विष्णु पौडेल, पृथ्वीसुब्बा गुरुङ, गोकर्ण विष्ट र रघुजी पन्तले ओलीको राजीनामा मागेका थिए भने महासचिव शंकर पोखरेलसहितका अधिकांश पदाधिकारीले पनि पार्टीलाई नयाँ दिशा दिन नेतृत्वले मार्गप्रशस्त गर्नुपर्ने धारणा राखेका छन्। अध्यक्ष ओलीले भने राजीनामा नदिने अडान राख्दै उपाध्यक्षहरूलाई विरोधी शक्तिसँग मिलेर पार्टीलाई संकटमा पार्ने प्रयास गरेको आरोप लगाएका छन्।

लुम्बिनी प्रदेशसभामा आगामी आर्थिक वर्ष २०८३/८४ को विनियोजन विधेयकका सिद्धान्त र प्राथमिकतामाथि छलफल सुरु भएको छ। आर्थिक मामिला तथा योजनामन्त्री धनेन्द्र कार्कीले प्रस्तुत गरेको बजेट उत्पादन, रोजगारी, पूर्वाधार विकास, सुशासन र सामाजिक न्यायमा केन्द्रित हुने बताइएको छ। सीमित स्रोत र बढ्दो दायित्वका बीच यथार्थपरक, कार्यान्वयनयोग्य र परिणाममुखी बजेट ल्याउने तयारी छ।

काठमाडौं उपत्यकामा ट्राफिक प्रहरीले पछिल्लो २४ घण्टामा ट्राफिक नियम उल्लंघन गर्ने १,८४१ जना सवारी चालकलाई कारबाही गरेको छ। यस कारबाहीबाट ४ लाख ७९ हजार ५०१ रुपैयाँ राजस्व संकलन भएको छ।

सिद्धार्थ राजमार्गअन्तर्गत बुटवल–पाल्पा सडकखण्डमा निर्माणाधीन सुरुङमार्ग आगामी असोजदेखि सञ्चालनमा ल्याउने लक्ष्यसहित निर्माण कार्य तीव्र पारिएको छ। आयोजनाका अनुसार सुरुङमार्गको हालसम्म भौतिक प्रगति ६८ प्रतिशत र वित्तीय प्रगति ५८ प्रतिशत पुगेको छ। आयोजना प्रमुख राजेश पौडेलले सुरुङमार्गमार्फत आगामी असोजसम्म यातायात सञ्चालन गर्ने लक्ष्यअनुसार कामलाई तीव्रता दिइएको जानकारी दिएका छन्।