Tourism Face

सरकारले सार्वजनिक सेवा प्रवाहलाई नागरिकको घरदैलोमै पुर्‍याउने उद्देश्यले सुरु गरेको सरकारी ‘कुरियर’ सेवा हाल देशका ६० जिल्लामा विस्तार भएको छ। हुलाक सेवा विभागले राहदानी, सवारी चालक अनुमतिपत्र (लाइसेन्स), शैक्षिक प्रमाणपत्रलगायत कागजात घरमै पुर्‍याउने कार्य तीव्र बनाएको छ। विभागका महानिर्देशक मनमाया भट्टराई पँगेनीका अनुसार प्रारम्भिक असहयोगपछि अहिले अधिकांश जिल्लामा सेवा प्रभावकारी रूपमा सञ्चालन भइरहेको छ।

गोरखाकी सगरमाथा आरोही पूर्णिमा श्रेष्ठले छैटौँ पटक विश्वको सर्वोच्च शिखर सगरमाथाको सफल आरोहण गरेकी छन्। 'सतोरी एड्भेञ्चर'को टोलीसँगै बुधबार शिखरमा पुगेकी श्रेष्ठले यसअघि सन् २०२४ को मे महिनामा १३ दिनभित्र तीन पटक सगरमाथा आरोहण गरेर गिनिज बुक अफ वर्ल्ड रेकर्डमा नाम लेखाएकी थिइन्।

सिद्धार्थनगर नगरपालिकाका प्रमुख इस्तियाक अहमद खानले भैरहवालाई नेपालको नमूना पर्यटकीय सहरका रूपमा विकास गर्ने घोषणा गरेका छन्। यसका लागि नगरपालिकाले नीति तथा कार्यक्रममार्फत पहल गर्ने उनले बताएका छन्। यस घोषणाले भैरहवालाई पर्यटकीय हबका रूपमा विकास गर्ने अपेक्षा गरिएको छ।

कर्णाली प्रदेशलाई अन्तर्राष्ट्रिय बजारमा प्रवर्द्धन गर्ने प्रतिबद्धतासहित ‘कर्णाली टुरिजम् मिट-२०२६’ सुर्खेतमा सम्पन्न भएको छ। ‘प्रकृती र संस्कृतीको काखमा’ नारासहित आयोजित यस कार्यक्रममा नेपाल पर्यटन बोर्ड र वीरेन्द्रनगर नगरपालिकाको आयोजना तथा होटल व्यवसायी महासंघ सुर्खेतको समन्वयमा भारतका विभिन्न सहरबाट करिब ५० जना पर्यटन व्यवसायी, पत्रकार र ब्लगरहरूको सहभागिता थियो। कार्यक्रमले कर्णाली पर्यटन प्रवर्द्धनमा नयाँ ऊर्जा थपेको र यस क्षेत्रमा धार्मिक, आध्यात्मिक तथा प्रकृतिमा आधारित पर्यटनको अथाह सम्भावना रहेको बताइएको छ।

प्रतिनिधिसभाको बैठकमा सांसदहरूले पछिल्लो समयमा देशका विभिन्न जिल्लामा आएको भीषण पानी, हावाहुरी र पहिरोका कारण प्रभावित नागरिकलाई उचित क्षतिपूर्ति र राहतको व्यवस्था गर्न सरकारको ध्यानाकर्षण गराएका छन्। सांसदहरूले विपद् जोखिम व्यवस्थापनमा सरकार गम्भीर हुनुपर्ने र प्रभावित क्षेत्रमा तत्काल राहत पुर्‍याउनुपर्नेमा जोड दिएका छन्।

राष्ट्रपति रामचन्द्र पौडेलले विश्वकै सर्वोच्च शिखर सगरमाथाको प्राकृतिक सौन्दर्य र हिमाली वातावरण जोगाउन सबै पक्ष जिम्मेवार बन्नुपर्ने आह्वान गरेका छन्। अन्तर्राष्ट्रिय सगरमाथा दिवसको अवसरमा आयोजित कार्यक्रममा उनले हिमाली सम्पदाको संरक्षण र सन्तुलित उपयोगबाट मात्र पर्यटन क्षेत्र मुलुकको आर्थिक विकासको आधार बन्न सक्ने बताए। राष्ट्रपति पौडेलले जलवायु परिवर्तनले हिमाली क्षेत्रमा पारेको असरप्रति चिन्ता व्यक्त गर्दै हिमाल जोगिए मात्र हिमाली पर्यटन टिकाउ हुने बताए।

अर्थमन्त्री डा. स्वर्णिम वाग्लेले आगामी आर्थिक वर्षको बजेट निर्माणका लागि आठ जना पूर्वअर्थमन्त्रीहरूसँग छलफल गरी सुझाव लिएका छन्। छलफलमा पूर्वअर्थमन्त्रीहरूले आर्थिक सुधार, खर्च कटौती, राजस्वको यथार्थ लक्ष्य निर्धारण, निजी क्षेत्रको मनोबल वृद्धि र उत्पादनमुखी क्षेत्रमा लगानी बढाउनुपर्ने जस्ता विषयमा जोड दिएका छन्। अर्थमन्त्री वाग्लेले सुशासनको जगमा टेकेर आम नेपालीको जीवनस्तर उकास्ने बजेट ल्याउने तयारी भएको बताए।

नेपाल पर्यटन बोर्ड र संयुक्त राष्ट्रसंघीय विकास कार्यक्रम (यूएनडीपी)को संयुक्त पहलमा नेपालको दिगो पर्यटनका लागि पाँचवर्षीय अन्तर्राष्ट्रिय बजारीकरण रणनीति र कार्ययोजना (२०२६-२०३०) तयार गरी सार्वजनिक गरिएको छ। यस रणनीतिले नेपालको पर्यटनलाई संख्यामा आधारित मोडलबाट मूल्यमा आधारित पर्यटनतर्फ रूपान्तरण गर्ने लक्ष्य राखेको छ।

वैज्ञानिकहरूले ग्यालापागोस टापु नजिक गहिरो समुद्रमा एक दुर्लभ नीलो रङको नयाँ अक्टोपस प्रजाति फेला पारेका छन्। समुद्री सतहबाट करिब १,८०० मिटर तल भेटिएको यो जीव आफ्नो असामान्य रङ, बनावट, बासस्थान र व्यवहारका कारण अनुसन्धानकर्ताहरूका लागि आश्चर्यको विषय बनेको छ। चार्ल्स डार्विन फाउन्डेसनको टोलीले पत्ता लगाएको यस प्रजातिबारेको अनुसन्धान हालै सार्वजनिक गरिएको हो।

काठमाडौं महानगरपालिकाले टुँडिखेलको सैनिक मञ्च दक्षिणतर्फको ६१ हजार २ सय ६३ वर्गमिटर क्षेत्रलाई हरियाली र व्यवस्थित सार्वजनिक स्थलका रूपमा विकास गर्ने काम तीव्र पारेको छ। यस परियोजनाअन्तर्गत घाँसे मैदान निर्माण, दुबो रोपण, बोरिङ निर्माण, पानी व्यवस्थापन र वर्षा पानी पुनर्भरणका लागि ‘वाटर रिचार्ज पिट’ निर्माण गरिनेछ। महानगरपालिकाले यस क्षेत्रमा कुनै स्थायी संरचना नबनाउने र सर्वसाधारणलाई आराम, व्यायाम, खेलकुद तथा सार्वजनिक कार्यक्रमका लागि सहज वातावरण उपलब्ध गराउने उद्देश्य राखेको छ।

चितवन राष्ट्रिय निकुञ्जमा चालु आर्थिक वर्षको वैशाखसम्म विदेशी पर्यटकको आगमन घटेको छ भने आन्तरिक पर्यटकको संख्या बढेको छ। गत आर्थिक वर्षको सोही अवधिको तुलनामा यस वर्ष सार्क र तेस्रो मुलुकका पर्यटक घटेका छन्, तर नेपाली पर्यटकको संख्या ३३ हजार ५७४ ले बढेको छ। नेपालमा भएका राजनीतिक घटनाक्रम र मध्यपूर्वमा द्वन्द्वका कारण विदेशी पर्यटक आगमनमा कमी आएको बताइएको छ।

चालु आर्थिक वर्षको १० महिनामा पाँच लाख ७३ हजार ९७७ पर्यटक मुस्ताङ भित्रिएका छन्, जसमा चार लाख २० हजार ८६ आन्तरिक र एक लाख ५३ हजार ८९१ बाह्य पर्यटक रहेका छन्। वारागुङ मुक्तिक्षेत्र गाउँपालिका–४ मा रहेको शालिग्राम पार्क आन्तरिक तथा बाह्य पर्यटकको भीडभाड हुने प्रमुख गन्तव्य बनेको छ।