कोसी प्रदेश

कोसी प्रदेशसभाको बैठक विपक्षी दलले अवरुद्ध पारेका छन्। सरकारले प्रस्तुत गरेको नीति तथा कार्यक्रममा संशोधन प्रस्ताव दर्ता गर्ने समय नदिई पारित गरेको भन्दै विपक्षी सांसदहरूले विरोध जनाएका हुन्। यस क्रममा रोस्ट्रमतर्फ गएका पूर्वमुख्यमन्त्री राजेन्द्र राईलाई मर्यादापालकले रोस्ट्रमबाट तल झारेका थिए।

सरकारले प्रशासनिक कार्यसम्पादनलाई प्रभावकारी बनाउने उद्देश्यले २९ जना सहसचिवहरूको एकैपटक सरुवा गरेको छ। सोमबार बसेको मन्त्रिपरिषद् बैठकले विभिन्न मन्त्रालय, आयोग र प्रदेशमा कार्यरत सहसचिवहरूको सरुवा गर्ने निर्णय गरेको हो। यस निर्णयअनुसार नारायणप्रसाद भण्डारीलाई सार्वजनिक खरिद अनुगमन कार्यालय र रामकुमार श्रेष्ठलाई राष्ट्रिय प्राकृतिक स्रोत तथा वित्त आयोगमा सरुवा गरिएको छ।

महालेखापरीक्षकको कार्यालयले हालै सार्वजनिक गरेको प्रतिवेदनअनुसार धरान उपमहानगरपालिकामा ८ करोड ७६ लाख रुपैयाँ र इटहरी उपमहानगरपालिकामा १ अर्ब २६ करोड रुपैयाँभन्दा बढी बेरुजु देखिएको छ। प्रतिवेदनले दुवै उपमहानगरपालिकाको वित्तीय व्यवस्थापन, आन्तरिक नियन्त्रण प्रणाली र लेखा खुलासामा गम्भीर कमजोरी औंल्याएको छ।

हाल नेपालमा पश्चिमी वायु र स्थानीय वायुको प्रभाव रहेको छ, जसले गर्दा पहाडी र हिमाली भूभागमा सामान्य बदली छ भने तराईका अधिकांश भूभाग मौसम सफा छ। जल तथा मौसम विज्ञान विभाग, मौसम पूर्वानुमान महाशाखाका अनुसार यस प्रभावले देशका केही स्थानमा मेघगर्जन/चट्याङसहित वर्षा र हिमपातको सम्भावना छ।