सुर्खेत

कर्णाली प्रदेशमा महिलाहरू पछिल्लो समय अटोचालक व्यवसायमा आकर्षित भइरहेका छन्, जहाँ १०० भन्दा बढी महिला यो पेसामा आबद्ध छन्। महिलालाई आत्मनिर्भर बनाउने उद्देश्यले कर्णाली प्रदेश सामाजिक विकास मन्त्रालयले ५४ जना महिला अटोचालकलाई तालिम प्रदान गरेको छ। यस तालिममा उनीहरूले पेसागत जोखिम, सामाजिक दृष्टिकोण र चुनौतीबारे अनुभव साटेका थिए।

एनआईसी एशिया बैंकले आफ्नो संस्थागत सामाजिक उत्तरदायित्व अन्तर्गत सुर्खेतको वीरेन्द्रनगरमा रहेको श्री नेपाल राष्ट्रिय प्राथमिक विद्यालयमा पानी ट्यांकी र मोटर जडान गरी हस्तान्तरण गरेको छ। विद्यालयमा स्वच्छ खानेपानीको व्यवस्थापन र शैक्षिक वातावरण सुधार गर्ने उद्देश्यले यो सहयोग प्रदान गरिएको हो।

मध्यपश्चिम विश्वविद्यालयमा कृषि विज्ञान अध्ययन गरिरहेका समीर खत्रीले सुर्खेतको राम घाटमा सञ्चालन गरेको कृषि व्यवसायबाट मनग्य आम्दानी गर्न सफल भएका छन्। उनले आफ्नो फार्ममा १२ जनालाई रोजगारीसमेत प्रदान गरेका छन्।

नेपाली कम्युनिष्ट पार्टी (नेकपा) का संयोजक पुष्पकमल दाहाल 'प्रचण्ड' ले सातै प्रदेशमा प्रमुख दलहरूबीच संयुक्त सरकार बन्ने संकेत गरेका छन्। उनले सरकारको कार्यशैलीप्रति असन्तुष्टि जनाउँदै नसुध्रिए सदन र सडकबाट आन्दोलन गर्ने चेतावनी दिएका छन्। प्रचण्डले कांग्रेस, एमाले, नेकपा र मधेस केन्द्रित दलहरू मिलेर साझा सरकार बन्ने बताएका छन्।

कैलालीको टीकापुरस्थित सशस्त्र प्रहरी बल नेपाल राजश्व तथा औद्योगिक तालिम शिक्षालयमा आधारभूत तालिमका क्रममा सात जना जवान बेहोस भएका छन् । दुई सय मिटर दौडका क्रममा बेहोस भएकामध्ये छ जनालाई नेपाली सेनाको हेलिकोप्टरमार्फत थप उपचारका लागि काठमाडौं ल्याइएको छ भने एक जनाको टीकापुर अस्पतालमा उपचार भइरहेको छ ।

फिरन्ते जीवन बिताउँदै आएका राउटे समुदाय सुर्खेतको गुर्भाकोट छाडेर सल्यानतिर बसाइँ सर्ने तयारीमा रहेको राउटे मुखिया प्रकाश शाहीले बताएका छन्। उनीहरूले बसाइँ सर्ने निश्चित स्थानबारे अन्य समुदायलाई जानकारी नदिने बताएका छन्।

नेपाली कांग्रेसकी सांसद उर्मिला थपलियाले दशौं राष्ट्रिय खेलकुद प्रतियोगिताको मिति अविलम्ब घोषणा गरी प्रतियोगिता सम्पन्न गर्न सरकारसमक्ष माग गरेकी छिन्। उनले प्रतियोगिताका लागि अर्बौं रुपैयाँ खर्च गरेर सुर्खेतमा निर्माण गरिएको रंगशाला प्रयोगविहीन बनेकोमा दुःख व्यक्त गरिन्। सांसद थपलियाले खेलाडीहरू अवसरको अभावमा निराश भएको र प्रतिभावान खेलाडी विदेश पलायन हुने क्रम बढेको बताइन्।

राष्ट्रिय तथ्याङ्क कार्यालयले आर्थिक वर्ष २०८२/८३ को प्रारम्भिक अनुमानअनुसार कर्णाली प्रदेशको अर्थतन्त्र करिब दुई खर्ब ७७ अर्ब रुपैयाँ पुग्ने प्रक्षेपण गरेको छ। तथ्यांक समन्वय कार्यालय सुर्खेतका सहायक तथ्यांक अधिकृत विनोद आचार्यका अनुसार कृषि, पर्यटन, जलविद्युत् र सेवा क्षेत्रको विस्तारले आर्थिक गतिविधिमा सुधार आउने अपेक्षा गरिएको छ। आगामी आर्थिक वर्षमा वित्तीय तथा बीमा सेवा क्षेत्रमा सबैभन्दा धेरै वार्षिक वृद्धिदर हुने अनुमान छ।

नेपाली सेनाले विगतका अनुभवका आधारमा यस वर्षको मनसुनका लागि पूर्वतयारी तथा प्रतिकार्य योजना कार्यान्वयनमा ल्याएको छ। यस योजनाअन्तर्गत विपद्को समयमा तत्काल परिचालन हुन सक्नेगरी फौज, उद्धार टोली, हेलिकप्टर र बेलिब्रिज तयारी अवस्थामा राखिएको छ। सेनाले सङ्घीय, प्रदेश र स्थानीय सरकारका निकाय, अन्य सुरक्षा निकाय, गैरसरकारी संस्था तथा स्थानीय समुदायसँग सहकार्य र समन्वयलाई प्राथमिकता दिएको छ।