Nepal Japan

प्रतिनिधिसभाको बैठक आज बिहान ११ बजे बस्ने भएको छ। बैठकमा संस्कृति, पर्यटन तथा नागरिक उड्डयनमन्त्री खडकराज पौडेलले पर्यटन विधेयक, २०८१ माथि विचार गरियोस् भन्ने प्रस्ताव प्रस्तुत गर्नेछन्। यसैगरी, प्रधानमन्त्री वालेन्द्र शाहका तर्फबाट कानुन, न्याय तथा संसदीय मामिलामन्त्री सोविता गौतमले राष्ट्रिय विधि विज्ञान प्रयोगशाला (स्थापना र सञ्चालन) विधेयक, २०८१ लाई दफावार छलफलका लागि समितिमा पठाउने प्रस्ताव प्रस्तुत गर्नेछिन्। बैठकमा प्रतिनिधिसभा सदस्य निर्वाचन (पहिलो संशोधन) विधेयक, २०८३ र मतदाता नामावली (पहिलो संशोधन) विधेयक, २०८३ माथिको दफावार छलफल तथा पारित गरियोस् भन्ने प्रस्तावसमेत प्रस्तुत गरिनेछ।

मलेसियामा जारी एसियाली खेलकुद महिला क्रिकेट छनोटमा नेपालले चीनलाई १२६ रनको लक्ष्य दिएको छ। टस जितेर पहिले ब्याटिङ गरेको नेपालले २० ओभरमा ५ विकेट गुमाउँदै १२५ रन बनायो, जसमा पूजा महतोले ६३ रनको अर्धशतकीय इनिङ खेलिन्। यो प्रतियोगितामा नेपालको पहिलो खेल हो भने चीनले आफ्नो पहिलो खेलमा इन्डोनेसियालाई पराजित गरेको थियो।

कास्की जिल्ला अदालतले राष्ट्रिय स्वतन्त्र पार्टीका सभापति रवि लामिछानेसहित सूर्यदर्शन सहकारी ठगी प्रकरणका प्रतिवादीहरूविरुद्ध दायर गरिएको सम्पत्ति शुद्धीकरण र संगठित अपराधसम्बन्धी अभियोग फिर्ता लिने सरकारी पक्षको निवेदन स्वीकृत गरेको छ। अदालतको यस आदेशसँगै अब लामिछानेसहितका प्रतिवादीहरूमाथि सहकारी ठगीसम्बन्धी आरोप मात्रै कायम रहने भएको छ।

चितवनस्थित बिपी कोइराला मेमोरियल क्यान्सर अस्पतालमा क्यान्सर उपचारका लागि अत्यावश्यक मानिने कार्बोप्लाटिन र सिसप्लाटिन जस्ता केमोथेरापी औषधिको चरम अभाव छ। विश्वव्यापी रूपमा कच्चा पदार्थको आपूर्तिमा कमी आएकाले यो समस्या उत्पन्न भएको हो। यसले गर्दा बिरामीहरूको उपचार प्रभावित भएको छ र उनीहरू गुणस्तरीय उपचारबाट वञ्चित हुने जोखिम बढेको छ।

कोशी प्रदेशसभाले आर्थिक वर्ष २०८३/८४ का लागि प्रदेश सरकारले प्रस्तुत गरेको वार्षिक नीति तथा कार्यक्रम सर्वसम्मतिले पारित गरेको छ। प्रदेश प्रमुख परशुराम खापुङले प्रस्तुत गरेको नीति तथा कार्यक्रममाथि छलफलपछि सभामुख अम्बरबहादुर विष्टले निर्णयार्थ प्रस्तुत गर्दा प्रतिपक्षका सांसदहरूले असहमति नजनाएपछि यसलाई पारित गरिएको घोषणा गरिएको थियो। मुख्यमन्त्री हिक्मतकुमार कार्कीले छलफलका क्रममा उठेका प्रश्नको जवाफ दिँदै सरकार सुशासन र गुणस्तरीय सेवामा केन्द्रित रहेको बताए।

संविधान संशोधन बहसपत्र तयार गर्ने कार्यदल, २०८३ को सचिवालयले आम नागरिकसँग राय सुझाव माग गरेको छ । संविधान संशोधन प्रक्रियामा सबै नेपाली नागरिकको सहभागिता सुनिश्चित गर्ने उद्देश्यले सात दिनभित्र लिखित सुझाव माग गरिएको हो । प्रधानमन्त्री वालेन्द्र शाहका राजनीतिक सल्लाहकार असिम शाह संयोजक रहेको कार्यदलले विभिन्न राजनीतिक दल, संविधानविद्, कानुनविद् र सरोकारवालाहरूसँग छलफल गरी सुझाव सङ्कलन गरिसकेको छ ।

स्वास्थ्य बीमा बोर्डले वित्तीय संकटको कारण देखाउँदै जेठ १६ गतेदेखि लागू हुने गरी निजी स्वास्थ्य संस्थामा आकस्मिकबाहेकका सबै स्वास्थ्य बीमा सेवा स्थगित गरेको छ। बोर्डको जेठ ११ गते बसेको बैठकले गरेको यो निर्णयले स्वास्थ्य बीमा कार्यक्रममा आबद्ध निजी स्वास्थ्य संस्थाहरूबाट प्रदान गरिने नियमित सेवाहरू अर्को सूचना नभएसम्मका लागि बन्द रहनेछ।

लुम्बिनी प्रदेश सरकारले आर्थिक वर्ष २०८३/८४ को लागि नीति तथा कार्यक्रम प्रदेशसभामा प्रस्तुत गरेको छ। प्रदेश प्रमुख कृष्णबहादुर घर्तीमगरले प्रस्तुत गरेको नीति तथा कार्यक्रममा सुशासन, आर्थिक समृद्धि र प्रशासनिक सुधारलाई प्राथमिकता दिइएको छ। यसअन्तर्गत हाल कायम रहेका १२ मन्त्रालयलाई घटाएर ८ मा झारिने घोषणा गरिएको छ।

प्रधानमन्त्री बालेन्द्र शाहले मंगलबार यहाँस्थित युरोपेली संघ (ईयू)मा आबद्ध देशका गैरआवासीय राजदूत तथा मिसन प्रमुखहरूसँग संयुक्त भेटवार्ता गरेका छन्। प्रधानमन्त्री तथा मन्त्रिपरिषद्को कार्यालयमा भएको उक्त भेटमा नेपालको वर्तमान प्राथमिकता, द्विपक्षीय सम्बन्ध सुदृढ तुल्याउने र सहकार्यका विविध विषयमा छलफल केन्द्रित भएको थियो।

आईसीसी विश्वकप लिग–२ अन्तर्गत शुक्रबार भएको खेलमा नेपालले अमेरिकालाई १२२ रनले पराजित गरेको छ। कीर्तिपुरस्थित त्रिवि मैदानमा टस जितेर पहिला बलिङ गरेको अमेरिकाविरुद्ध नेपालले ५० ओभरमा ८ विकेटको क्षतिमा ३१७ रन बनाएको थियो। ३१८ रनको लक्ष्य पछ्याएको अमेरिका ४१ ओभर २ बलमा १९५ रनमा अलआउट भयो।

प्रधानमन्त्री बालेन्द्र शाहले युरोपेली संघ (ईयू) मा आबद्ध देशका राजदूतहरूसँगको भेटमा नेपाली नागरिकको दैनिक जीवनस्तर उकास्ने र सुशासन कायम गर्ने सरकारको प्रतिबद्धता दोहोर्‍याएका छन्। उनले नयाँ सरकार गठन भए पनि नीतिगत निरन्तरता रहने, लोकतान्त्रिक मूल्यमान्यताको संरक्षण र राजनीतिक स्थिरता कायम गरिने स्पष्ट पारे। प्रधानमन्त्रीले नेपालले सन्तुलित र व्यावहारिक विदेश नीति अवलम्बन गर्ने तथा व्यापार, लगानी, हरित ऊर्जा, जलवायु र पर्यटनजस्ता क्षेत्रमा सहकार्य सुदृढ गरिने बताए।

काठमाडौं उपत्यकाबाट बाहिरिने लामो दूरीका सार्वजनिक सवारी साधनमा यात्रुको सामान सुरक्षित बनाउन र हराउने वा साटिने समस्या अन्त्य गर्नका लागि ‘लगेज ट्याग’ प्रणाली लागू गरिने भएको छ। यसका लागि काठमाडौं उपत्यका ट्राफिक प्रहरी कार्यालय र राष्ट्रिय यातायात व्यवसायी महासंघबीच सम्झौता भएको छ। यो प्रणाली आगामी जेठ १५ गतेदेखि लागू हुनेछ।