OSNepal

काठमाडौं उपत्यकाबाट बाहिरिने लामो दूरीका सार्वजनिक सवारी साधनमा यात्रुको सामान सुरक्षित बनाउन र हराउने वा साटिने समस्या अन्त्य गर्नका लागि ‘लगेज ट्याग’ प्रणाली लागू गरिने भएको छ। यसका लागि काठमाडौं उपत्यका ट्राफिक प्रहरी कार्यालय र राष्ट्रिय यातायात व्यवसायी महासंघबीच सम्झौता भएको छ। यो प्रणाली आगामी जेठ १५ गतेदेखि लागू हुनेछ।

मुटुरोग विशेषज्ञ डा. मिलन श्रेष्ठका अनुसार नेपालमा पछिल्लो समय युवा अवस्थाका व्यक्तिहरूमा उच्च रक्तचाप, मधुमेह र कोलेस्ट्रोलको समस्या बढ्दै गएकाले हृदयघातको जोखिम बढेको छ। महत्वाकांक्षी सोच, अत्यधिक काम, शारीरिक व्यायामको कमी, चुरोट-सूर्ति सेवन र मानसिक तनाव जस्ता कारणले युवामा मुटुसम्बन्धी समस्या निम्त्याइरहेको छ। यद्यपि, हृदयघात हुनेबित्तिकै मृत्यु नहुने र उपचार पद्धति विकास भइसकेको उनले बताए।

काठमाडौंको टोखामा स्पा सेन्टर सञ्चालन गरी १६ वर्षीया नाबालिकालाई यौनजन्य कार्यमा संलग्न गराएको आरोपमा पक्राउ परेकी अनिता भण्डारीलाई पुर्पक्षका लागि कारागार चलान गरिएको छ। प्रहरीले ललाइफकाइ स्पामा काममा राखेर यौनजन्य क्रियाकलापमा संलग्न गराएको कसुरमा भण्डारीलाई नियन्त्रणमा लिएको थियो।

मेडिकल व्यवसायी दुर्गा प्रसाईंलाई पर्सा जिल्ला अदालतले साधारण तारेखमा रिहा गर्न आदेश दिएको छ। अदालतको आदेशपछि उनी थुनामुक्त भएका हुन् र अब जेलबाहिरै रहेर कानुनी प्रक्रियाको सामना गर्नेछन्। प्रसाईंविरुद्ध साइबर अपराध र राज्यविरुद्धको कसुरमा मुद्दा दर्ता गरिएको थियो।

परराष्ट्रमन्त्री शिशिर खनाल र परराष्ट्र सचिव अमृतबहादुर राईले नेपालको परराष्ट्र नीतिलाई बदलिँदो विश्व परिवेशअनुसार आर्थिक समृद्धि, सुशासन र राष्ट्रिय हितसँग जोड्दै आर्थिक कूटनीतिलाई प्रमुख प्राथमिकता दिनुपर्नेमा जोड दिएका छन्। दुवै अधिकारीले परराष्ट्र सेवालाई केवल औपचारिक कूटनीतिक सम्बन्धमा सीमित नराखी देशको आर्थिक विकास, लगानी प्रवद्र्धन, पर्यटन विस्तार र अन्तर्राष्ट्रिय साझेदारी सुदृढ गर्ने महत्वपूर्ण माध्यमका रूपमा विकास गर्नुपर्ने बताएका छन्।

देशव्यापी प्रदर्शनरत चलचित्र ‘काजी’को असारे गीत ‘ज्यानको तिर्खा’ सार्वजनिक गरिएको छ। प्रशान्त सिवाकोटीको शब्द तथा संगीत रहेको यो गीतमा रचना रिमाल र सिवाकोटीकै स्वर सुन्न सकिन्छ। चलचित्रले प्रदर्शनको सुरुवाती चरणमा दर्शकबाट राम्रो प्रतिक्रिया पाइरहेको छ।

नेपाल क्रिकेट संघ (क्यान) ले सन् २०२६ का लागि ३८ पुरुष र २५ महिला खेलाडीको नयाँ वर्गीकरण सार्वजनिक गरेको छ। खेलाडीको प्रदर्शन र योगदानका आधारमा उनीहरूलाई विभिन्न श्रेणीमा विभाजन गरिएको हो। पुरुषतर्फको ‘ए प्लस’ श्रेणीमा कप्तान रोहितकुमार पौडेल, दीपेन्द्रसिंह ऐरी र सन्दीप लामिछाने परेका छन्।

लुम्बिनी प्रदेश सरकारले आर्थिक वर्ष २०८३/८४ को लागि नीति तथा कार्यक्रम प्रदेशसभामा प्रस्तुत गरेको छ। प्रदेश प्रमुख कृष्णबहादुर घर्तीमगरले प्रस्तुत गरेको नीति तथा कार्यक्रममा सुशासन, आर्थिक समृद्धि र प्रशासनिक सुधारलाई प्राथमिकता दिइएको छ। यसअन्तर्गत हाल कायम रहेका १२ मन्त्रालयलाई घटाएर ८ मा झारिने घोषणा गरिएको छ।

प्रधानमन्त्री बालेन्द्र शाहले मंगलबार यहाँस्थित युरोपेली संघ (ईयू)मा आबद्ध देशका गैरआवासीय राजदूत तथा मिसन प्रमुखहरूसँग संयुक्त भेटवार्ता गरेका छन्। प्रधानमन्त्री तथा मन्त्रिपरिषद्को कार्यालयमा भएको उक्त भेटमा नेपालको वर्तमान प्राथमिकता, द्विपक्षीय सम्बन्ध सुदृढ तुल्याउने र सहकार्यका विविध विषयमा छलफल केन्द्रित भएको थियो।

प्रधानमन्त्री बालेन्द्र शाहले युरोपेली संघ (ईयू) मा आबद्ध देशका राजदूतहरूसँगको भेटमा नेपाली नागरिकको दैनिक जीवनस्तर उकास्ने र सुशासन कायम गर्ने सरकारको प्रतिबद्धता दोहोर्‍याएका छन्। उनले नयाँ सरकार गठन भए पनि नीतिगत निरन्तरता रहने, लोकतान्त्रिक मूल्यमान्यताको संरक्षण र राजनीतिक स्थिरता कायम गरिने स्पष्ट पारे। प्रधानमन्त्रीले नेपालले सन्तुलित र व्यावहारिक विदेश नीति अवलम्बन गर्ने तथा व्यापार, लगानी, हरित ऊर्जा, जलवायु र पर्यटनजस्ता क्षेत्रमा सहकार्य सुदृढ गरिने बताए।

नेकपा एमालेको केन्द्रीय सचिवालय बैठकमा अधिकांश सदस्यहरूले अध्यक्ष केपी शर्मा ओलीलाई नेतृत्व हस्तान्तरण गरी पार्टी पुनर्गठन गर्न सुझाव दिएका छन्। शुक्रबारदेखि जारी बैठकमा उपाध्यक्षहरू, महासचिव, उपमहासचिव र सचिवहरूले आ-आफ्नो धारणा राखेका छन्। आजको बैठकमा अध्यक्ष ओलीले नेताहरूले उठाएका प्रश्नहरूको जवाफ दिने कार्यक्रम छ।

सरकारले बाजुरा र हुम्ला जिल्लाको सीमासम्बन्धी प्राविधिक पक्षको अध्ययन गरी प्रतिवेदन पेस गर्न नापी विभागका उपमहानिर्देशक सुशील डंगोलको संयोजकत्वमा एक समिति गठन गरेको छ। भूमि व्यवस्था, सहकारी, संघीय मामिला तथा सामान्य प्रशासन मन्त्री प्रतिभा रावलको अध्यक्षतामा सिंहदरबारमा बसेको बैठकले यो निर्णय गरेको हो।