इटहरी

महालेखापरीक्षकको ६३ औं प्रतिवेदनले ग्यास ढुवानी कारोबारमा ठूलो अनियमितता र कर छली भएको खुलासा गरेको छ। प्रतिवेदन अनुसार, नेपाल आयल निगममार्फत आपूर्ति देखाई कारोबार गरिए पनि वास्तविक ढुवानी भाडा ग्यास उद्योगहरूले भुक्तानी गर्दा ५ प्रतिशत ढुवानी भाडा थप गरी कर निर्धारण गरिएको र यसरी बढी खर्च देखाएर कर छुटसमेत लिइएको पाइएको छ। यसबाट कुल ४ करोड ८६ लाख ९० हजार बराबरको कर, ब्याज र जरिवाना छली भएको उल्लेख छ।

एसियन राजमार्गअन्तर्गत काँकरभिट्टा–लौकही सडकखण्डको कालोपत्र कार्यमा विटुमिनको मूल्य वृद्धि र अभावका कारण ढिलासुस्ती भएको छ। आयोजनाका अनुसार दुई महिनाअघि प्रतिलिटर रु १००-११० मा पाइने भारतीय विटुमिन अहिले रु १५० भन्दा बढी पर्न थालेको छ, जसले निर्माण कार्यलाई प्रभावित पारेको छ।

इटहरीमा आगामी जेठ ९ गते शनिबार लेखक केशव दाहालको उपन्यास ‘इथा’ माथि विशेष साहित्यिक विमर्श कार्यक्रम आयोजना हुने भएको छ । ‘साहित्य, सङ्गीत र साधना उत्सव, २०८३’ अन्तर्गत हुने यस कार्यक्रममा उपन्यासको गृह विमोचनसमेत गरिने आयोजकले जनाएको छ । यस विमर्शमा भूषिता वशिष्ठ, लीला अनमोल र लेखक दाहाल स्वयं सहभागी हुनेछन् ।

करिब १४ महिनाअघि आगलागीमा परेको इटहरीस्थित क्यूएफएक्स सिनेमाज नयाँ व्यवस्थापन, आकर्षक सजावट र स्तरोन्नति गरिएको प्रविधि सहित औपचारिक रूपमा पुनः सञ्चालनमा आएको छ। जेठ ७ गते फिल्म ‘मितज्यू’को प्रिमियर शो आयोजना गरी हलको ‘री-ओपनिङ’ गरिएको हो। दर्शकलाई विश्वस्तरीय चलचित्र अनुभव दिन अत्याधुनिक टुके डिजिटल प्रोजेक्टर, प्रिमियम साउन्ड सिस्टम, आरामदायी सिट र उत्कृष्ट ग्राहक सेवा जडान गरिएको छ।

नेपाली सेनाले विगतका अनुभवका आधारमा यस वर्षको मनसुनका लागि पूर्वतयारी तथा प्रतिकार्य योजना कार्यान्वयनमा ल्याएको छ। यस योजनाअन्तर्गत विपद्को समयमा तत्काल परिचालन हुन सक्नेगरी फौज, उद्धार टोली, हेलिकप्टर र बेलिब्रिज तयारी अवस्थामा राखिएको छ। सेनाले सङ्घीय, प्रदेश र स्थानीय सरकारका निकाय, अन्य सुरक्षा निकाय, गैरसरकारी संस्था तथा स्थानीय समुदायसँग सहकार्य र समन्वयलाई प्राथमिकता दिएको छ।