Nepali Digital Newspaper

इरानले अमेरिकासँग सम्भावित सम्झौताका लागि १४ बुँदे खाकालाई अन्तिम रूप दिने तयारी भइरहेको जनाएको छ। इरानी विदेश मन्त्रालयका प्रवक्ता इस्माइल बकाईले शनिबार सरकारी टेलिभिजनमार्फत दुवै पक्षबीच सहमतिका आधार तयार पार्ने प्रयास भइरहेको जानकारी दिएका हुन्। यद्यपि, तेहरान र वासिङ्टनबीच अझै पनि गहिरा मतभेद कायम रहेको उनले बताएका छन्।

नेपाली कांग्रेसले आफ्नो भ्रातृ संस्था नेपाल तरुण दलको केन्द्रीय अध्यक्षमा मनिष कोइरालालाई नियुक्त गरेको छ। पार्टी सभापति गगनकुमार थापाले विधानको धारा ४२ (१) (च) बमोजिम कोइरालालाई अध्यक्ष पदमा नियुक्त गरेका हुन्। गत वैशाख २१ गते बसेको केन्द्रीय कार्यसम्पादन समितिको बैठकको निर्णयअनुसार यो नियुक्ति गरिएको हो।

सर्वोच्च अदालतले नेपालमा चलिरहेका मुद्दामा विदेशबाट अनलाइनमार्फत बयान र वकपत्र गराउन सकिने आदेश जारी गरेको छ। न्यायाधीशद्वय हरि फुयाल र बालकृष्ण ढकालको संयुक्त इजलासले सूचना प्रविधिको प्रयोगलाई सहज बनाउँदै न्याय सम्पादनको सुगमताका लागि यो निर्णय गरेको हो। यसबाट विदेशमा रहेका नेपाली नागरिकले दूतावास वा कूटनीतिक निकायमा उपस्थित भई बयान र वकपत्र दिन पाउनेछन्।

प्रहरीले काठमाडौंको गोङ्गबुस्थित काबेली गेष्टहाउसबाट एसएलआरको म्याग्जिन र ४५ राउण्ड गोलीसहित दुई जनालाई पक्राउ गरेको छ। पक्राउ पर्नेमा सप्तरीका खगेन्द्र शर्मा र काठमाडौंका ओमशंकर गुप्ता छन्। उनीहरूमाथि थप अनुसन्धान भइरहेको छ।

नेपालकी पलेशा गोवर्धनले ११औँ एसियाली पारा तेक्वान्दो प्रतियोगितामा कास्यपदक जितेकी छन्। मंगोलियाको उलानबटारमा भएको के-४४ क्याटगोरीको महिला ५७ केजीमुनि भएको खेलमा उनी इरानकी जहरा रहिमीसँग सेमिफाइनलमा पराजित भएपछि कास्यमा सीमित भइन्। यसअघि पलेशा विश्व वरीयताका आधारमा एसियाली पारा तेक्वान्दोका लागि छनोट भइसकेकी थिइन्।

प्रतिनिधिसभाका सभामुख डोलप्रसाद अर्यालले प्रधानमन्त्री बालेन्द्र साह सांसदहरूले उठाएका प्रश्नको जवाफ दिन संसदमा उपस्थित हुने तयारीमा रहेको जानकारी दिएका छन्। विपक्षी दलहरूले प्रधानमन्त्रीको जवाफ माग गर्दै सदन अवरुद्ध गरेपछि सभामुख अर्यालले प्रधानमन्त्रीले सदनमा आउने तयारी गरिरहेको र यस विषयमा उहाँ जानकार रहेको बताए। उनले बजेट आउन लागेकाले कार्यसूची अगाडि बढाउन आग्रह गरे।

खोटाङको दिप्रुङ चुइचुम्मा गाउँपालिका–४ बतासेकी रेश्मिका परियारको हत्या प्रकरणमा संलग्न रहेको अभियोगमा प्रहरीले उच्च अदालत ओखलढुङ्गाको आदेशपछि थप तीन युवालाई पक्राउ गरेको छ। पक्राउ पर्नेमा हेमन परियार, दीपक श्रेष्ठ र दीपक राई रहेका छन्। यसअघि यस प्रकरणमा एक किशोरलाई पक्राउ गरी कारागार चलान गरिएको थियो।

म्याग्दीको रघुगंगा गाउँपालिका-२ माथिल्लो बैसरी (सिरुवारी)मा पहिरो खसेपछि मुस्ताङलाई चीनको कोरला नाका जोड्ने बेनी-जोमसोम सडकखण्डमा यातायात सम्पर्कविच्छेद भएको छ। पहिरोका कारण बेनीदेखि मुस्ताङ र जोमसोमदेखि बेनीतर्फ आउँदै गरेका सवारीसाधन बीच बाटोमै रोकिएका छन्।

नेकपा एमालेको केन्द्रीय सचिवालय बैठकमा अधिकांश सदस्यहरूले अध्यक्ष केपी शर्मा ओलीलाई नेतृत्व हस्तान्तरण गरी पार्टी पुनर्गठन गर्न सुझाव दिएका छन्। शुक्रबारदेखि जारी बैठकमा उपाध्यक्षहरू, महासचिव, उपमहासचिव र सचिवहरूले आ-आफ्नो धारणा राखेका छन्। आजको बैठकमा अध्यक्ष ओलीले नेताहरूले उठाएका प्रश्नहरूको जवाफ दिने कार्यक्रम छ।

काठमाडौं उपत्यकाबाट बाहिरिने लामो दूरीका सार्वजनिक सवारी साधनमा यात्रुको सामान सुरक्षित बनाउन र हराउने वा साटिने समस्या अन्त्य गर्नका लागि ‘लगेज ट्याग’ प्रणाली लागू गरिने भएको छ। यसका लागि काठमाडौं उपत्यका ट्राफिक प्रहरी कार्यालय र राष्ट्रिय यातायात व्यवसायी महासंघबीच सम्झौता भएको छ। यो प्रणाली आगामी जेठ १५ गतेदेखि लागू हुनेछ।

मधेस प्रदेशका मुख्यमन्त्री कृष्णप्रसाद यादवले प्रदेशसभाबाट विश्वासको मत प्राप्त गरेका छन्। जनमत पार्टीले समर्थन फिर्ता लिएपछि संवैधानिक व्यवस्थाअनुसार मुख्यमन्त्री यादवले विश्वासको मत लिएका हुन्। यसअघि नेपाली कांग्रेसभित्रको आन्तरिक असन्तुष्टि र ‘फ्लोर क्रस’ हुने जोखिमका कारण विश्वासको मत लिने प्रक्रिया स्थगित भएको थियो।

नेकपा (एमाले) को सचिवालय बैठकमा महासचिव, उपमहासचिव र सचिवहरूले आ-आफ्नो धारणा राख्ने क्रम जारी छ। पार्टी अध्यक्ष केपी शर्मा ओलीको निवासमा बसेको बैठकमा अधिकांश पदाधिकारीले धारणा राखिसकेका छन् र बाँकीले आइतबार राख्नेछन्। सबैको धारणापछि प्रस्तावित एजेन्डामाथि निर्णय प्रक्रिया अघि बढाइने उपमहासचिव लेखराज भट्टले जानकारी दिएका छन्।