सुनसरी

सर्लाही प्रहरीले भरुवा बन्दुकसहित बुद्धिमान घलानलाई पक्राउ गरेको छ। यसैबीच, सुनसरीमा प्रहरीले कटुवा पेस्तोलसहित दुई जनालाई नियन्त्रणमा लिएको छ। दुवै घटनामा थप अनुसन्धान भइरहेको प्रहरीले जनाएको छ।

आर्थिक वर्ष २०८१/८२ मा कोशी टप्पु वन्यजन्तु आरक्षमा ११,६०३ पर्यटकले भ्रमण गरेका छन् । भ्रमण गर्नेमा ११,२१४ आन्तरिक पर्यटक रहेका छन् भने विदेशी पर्यटकको सङ्ख्या ३८९ रहेको छ । आरक्ष प्रमुख एवं वरिष्ठ संरक्षण अधिकृत भूपेन्द्रप्रसाद यादवका अनुसार जैविक विविधता, दुर्लभ वन्यजन्तु र शान्त वातावरणका कारण आरक्ष पर्यटकको रोजाइमा पर्ने गरेको छ ।

तराई क्षेत्रका खेतबारीमा पाइने चराचुरुङ्गीको संख्या घट्दै गएको एक अध्ययनले देखाएको छ। सन् २०१८ देखि तराईका चार जिल्लामा गरिएको स्थलगत अध्ययन अनुसार कृषि प्रणालीमा आएको परिवर्तन, रासायनिक विषादीको प्रयोग, बासस्थानको अभाव र जलवायु परिवर्तन जस्ता कारणले खेतबारीमा आश्रित चरा कम देखिन थालेको डा. हेमबहादुर कटुवालले बताएका छन्।

प्रतिनिधिसभा सदस्य लालविक्रम थापाले सुनसरीस्थित बुढीखोलाको कटान नियन्त्रणका लागि बजेट विनियोजन गर्न सरकारसँग माग गरेका छन्। उनले पत्रकार महासंघ सुनसरी शाखाको भवन निर्माणका लागि पनि बजेट विनियोजन गर्न ध्यानाकर्षण गराए।

सुनसरी जिल्लामा पछिल्लो समय जघन्य अपराधको ग्राफ तीव्र गतिमा उकालो लागेको छ। चालु आर्थिक वर्ष २०८२/८३ को वैशाख मसान्तसम्म मात्रै जिल्लामा ४४४ वटा जघन्य अपराधका मुद्दा दर्ता भएका छन्। कुल जघन्य अपराधमध्ये आधाभन्दा बढी लागूऔषध कारोबार तथा प्रयोगसँग सम्बन्धित छन्।

सुनसरीको रामधुनी नगरपालिका–७ स्थित चौसठ्ठीबिघा (रास ताल)मा श्री नं २ बाहिनी अड्डाको आयोजनामा एकीकृत जिल्ला विपद् प्रतिकार्य ‘अभ्यास मनसुन–६’ सम्पन्न भएको छ । मनसुनको समयमा कोशी प्रदेशमा हुनसक्ने सम्भावित प्राकृतिक विपद्लाई मध्यनजर गर्दै नेपाली सेना, नेपाल प्रहरी, सशस्त्र प्रहरी तथा विभिन्न सरकारी निकायहरूको सहभागितामा यो अभ्यास गरिएको हो । पूर्वी पृतना हेडक्वार्टर इटहरीका पृतनापति गौरवकुमार केसीले यस्ता अभ्यासले खोज तथा उद्धार कार्यलाई प्रभावकारी बनाउन सहयोग पुग्ने बताएका छन् ।

विभिन्न स्थानमा भएका सवारी दुर्घटनामा एक जनाको मृत्यु भएको छ भने ११ जना घाइते भएका छन्। मकवानपुरमा विद्युतीय गाडी ब्रेक फेल भएर दुर्घटना हुँदा ११ जना घाइते भएका छन्। सुनसरीमा अत्यधिक गतिका कारण अनियन्त्रित भई स्कुटर दुर्घटना हुँदा एक जनाको मृत्यु भएको छ।

रास्वपा सांसद लिमा अधिकारीले कृषिप्रधान देशमा किसानको भुक्तानीमा ढिलासुस्ती भएको भन्दै सरकारको ध्यानाकर्षण गराएकी छिन्। उनले मकवानपुरका दूध उत्पादक किसानको मात्र १४ करोडभन्दा बढी भुक्तानी बाँकी रहेको र देशभर उखु, धानलगायतका उत्पादनको भुक्तानी नपाएको बताइन्।

कोशी प्रदेशका मुख्यमन्त्री हिक्मतकुमार कार्कीले सुनसरी क्षेत्रलाई धार्मिक एवं पर्यटकीय दृष्टिले महत्त्वपूर्ण स्थानका रूपमा विकास गरिने बताएका छन्। उनले धार्मिक पर्यटन प्रवद्र्धनलाई प्रदेश सरकारले प्राथमिकता दिने स्पष्ट पारे। यसका साथै, उनले कोशी टप्पु वन्यजन्तु आरक्षण व्यवस्थापनको जिम्मेवारी प्रदेश सरकारलाई दिनुपर्ने धारणा व्यक्त गरे।

कोशी प्रदेशमा सिटी सफारी (अटो) साधनका कारण पछिल्लो तीन आर्थिक वर्षमा १ हजार ६ सय ७५ वटा दुर्घटना भएका छन् जसमा ५३ जनाको मृत्यु भएको छ। प्रदेश ट्राफिक प्रहरी कार्यालयका अनुसार आर्थिक वर्ष २०८०/०८१ मा ३५५ दुर्घटनामा १७ को मृत्यु, २०८१/०८२ मा ६२० दुर्घटनामा १७ को मृत्यु र चालु आर्थिक वर्ष २०८२/०८३ को वैशाखसम्म ७०० दुर्घटनामा १९ जनाको मृत्यु भएको छ। जिल्लागत रूपमा हेर्दा मोरङ र सुनसरी सिटी सफारी दुर्घटनाको 'हटस्पट' बनेका छन्।