ईमाउण्टेन समाचार

काठमाडौं मेडिकल कलेज (केएमसी) शिक्षण अस्पतालले छाला, कपाल र नङसम्बन्धी रोगहरूको निदान तथा सौन्दर्य अभिवृद्धिका लागि अत्याधुनिक चिकित्सा सेवा विस्तार गरेको छ। सिनामंगलस्थित अस्पतालले डर्माटोलोजी र प्लास्टिक सर्जरी विधाअन्तर्गत जटिल समस्याहरूको वैज्ञानिक र सुरक्षित उपचार पद्धति सञ्चालनमा ल्याएको छ। अस्पतालले विशेषज्ञ चिकित्सक र करोडौँ मूल्यका लेजर उपकरण प्रयोग गरी सेवा प्रदान गरिरहेको छ।

नेपाल बार एशोसिएशनका अध्यक्ष प्रा.डा. विजयप्रसाद मिश्रले सर्वोच्च अदालतमा लागू गरिएको गोलाप्रथा पेसी प्रणाली हटाउने तयारीप्रति आपत्ति जनाएका छन्। उनले यो प्रणाली हटाएर प्रधानन्यायाधीश स्वयंले पेसी तोक्ने व्यवस्था ल्याइएमा न्यायपालिका राजनीतिक प्रभावमा पर्ने चेतावनी दिएका छन्। मिश्रले यस्तो अवस्था आए सशक्त आन्दोलन गर्ने चेतावनीसमेत दिएका छन्।

नेपालको प्राचीन सांस्कृतिक सम्पदा ‘चर्या नृत्य’ को संरक्षण र प्रवद्र्धनका लागि सरोकारवालाहरूले पहल थालेका छन् । काठमाडौंमा आयोजित एक कार्यक्रममा बज्रयानी संस्कृति र अध्यात्मको संगम मानिने यस नृत्यका क्षेत्रमा योगदान पुर्‍याएका गुरु यज्ञमान पति बज्राचार्यलाई सम्मान गरियो । काठमाडौं महानगरपालिका, यूनेस्को र काठमाडौं सिटी अफ फिल्म्सको आयोजनामा भएको कार्यक्रममा चर्या नृत्यका विभिन्न प्रस्तुतिहरू पनि देखाइएको थियो ।

राष्ट्रिय स्वतन्त्र पार्टीकी सांसद अनुष्का श्रेष्ठले सडकमा अत्यधिक भारवाहक सवारी साधनको तीव्र गतिको कारण सर्वसाधारणको ज्यान जोखिममा परेको भन्दै संसदमा सरकारको ध्यानाकर्षण गराएकी छिन्। उनले ललितपुरको कार्यविनायक–नखु सडकखण्डमा भएको दुर्घटनाको उदाहरण दिँदै निर्धारित गति सीमाभन्दा बढी गतिमा सवारी चलाउने प्रवृत्ति बढेको र यसले दुर्घटनाको जोखिम उच्च बनाएको दाबी गरिन्।

शिक्षा सचिव चुणामणि पौडेलले शिक्षा मन्त्रालयअन्तर्गत विद्यालय भवन निर्माणसँग सम्बन्धित पुराना बेरुजु फर्स्यौट गर्न ठूलो समस्या देखिएको बताएका छन्। सार्वजनिक लेखा समितिको बैठकमा बोल्दै उनले साविक जिल्ला शिक्षा कार्यालयमार्फत विद्यालय भवन निर्माणका लागि गएको बजेटको फर्स्यौट हुन नसकेको अधिकांश बेरुजु अहिले पनि बाँकी रहेको स्पष्ट पारे। भवन निर्माण सम्पन्न भइसके पनि आवश्यक कागजात र प्रमाण अभावका कारण बेरुजु फर्स्यौट हुन नसकेको उनले जानकारी दिए।

नेपाली कांग्रेसका सांसद जगत तिमल्सिनाले त्रिभुवन विश्वविद्यालयमा २०६५ सालपछि नियुक्त प्राध्यापक तथा कर्मचारीहरू ४५ दिनदेखि आन्दोलनरत हुँदा पनि सरकारले चासो नदिएको भन्दै राष्ट्रिय सभाको बैठकमा सरकारको ध्यानाकर्षण गराएका छन्। उनले नवप्रवर्तन, खोज तथा अनुसन्धानमा सक्रिय हुनुपर्ने प्राध्यापकहरू आन्दोलनमा बस्दा विश्वविद्यालयको अध्ययन अध्यापन प्रभावित भएको बताए।

जापानको सहयोगमा बिपी राजमार्गको काभ्रेपलाञ्चोकको पिप्लेदेखि बर्खेखोला सडकखण्डको स्थायी पुनर्निर्माण कार्य सुरु भएको छ। नेपालका लागि जापानी राजदूत माएदा तोरु र पूर्वाधार विकास मन्त्रालयका सचिव गोपालप्रसाद सिग्देलले संयुक्त रूपमा परियोजनाको शिलान्यास गरेका हुन्। जापान अन्तर्राष्ट्रिय सहयोग नियोग (जाइका)को आर्थिक तथा प्राविधिक सहयोगमा ३.२ किलोमिटर सडकखण्डको पुनर्निर्माण सुरु भएको छ।

अर्थमन्त्री डा. स्वर्णिम वाग्लेले संघीय संसद्मा आर्थिक वर्ष २०८२/८३ को आर्थिक सर्वेक्षण प्रस्तुत गर्दै चालू आर्थिक वर्षमा नेपालको अर्थतन्त्र ३.८५ प्रतिशतले विस्तार हुने अनुमान गरिएको बताएका छन्। विश्व अर्थतन्त्र ३.१ प्रतिशतमा खुम्चने प्रक्षेपण भइरहेका बेला नेपालको यो वृद्धिदरलाई सकारात्मक मानिएको छ। सर्वेक्षणअनुसार मुलुकको अर्थतन्त्रको कुल आकार ६६ खर्ब रुपैयाँ पुग्ने र नेपालीको प्रतिव्यक्ति कुल राष्ट्रिय आय १,५३५ अमेरिकी डलर पुग्ने प्रक्षेपण गरिएको छ।

नेकपा (एमाले) को सचिवालय बैठकमा महासचिव, उपमहासचिव र सचिवहरूले आ-आफ्नो धारणा राख्ने क्रम जारी छ। पार्टी अध्यक्ष केपी शर्मा ओलीको निवासमा बसेको बैठकमा अधिकांश पदाधिकारीले धारणा राखिसकेका छन् र बाँकीले आइतबार राख्नेछन्। सबैको धारणापछि प्रस्तावित एजेन्डामाथि निर्णय प्रक्रिया अघि बढाइने उपमहासचिव लेखराज भट्टले जानकारी दिएका छन्।

नेपाल उद्योग वाणिज्य महासंघ (एफएनसीसीआई) को वरिष्ठ उपाध्यक्षमा सुरकृष्ण वैद्य र कोषाध्यक्षमा मनिषलाल प्रधान निर्वाचित भएका छन्। शुक्रबार सम्पन्न निर्वाचनमा वैद्यले ५६ मत प्राप्त गर्दै रामचन्द्र संघईलाई ३० मतले पराजित गरे भने प्रधानले ६१ मत प्राप्त गरी अम्बिकाप्रसाद पौडेललाई २५ मतले हराए।

राष्ट्रिय स्वतन्त्र पार्टी (रास्वपा) का प्रमुख सचेतक कविन्द्र बुर्लाकोटीले प्रधानमन्त्री बालेन्द्र शाह सम्भवतः एक हप्ताभित्र प्रतिनिधिसभा बैठकमा उपस्थित भई सांसदहरूले उठाएका प्रश्नको जवाफ दिने जानकारी दिएका छन्। विपक्षी दलहरूले प्रधानमन्त्रीको निरन्तर अनुपस्थितिलाई लिएर संसद् बैठक अवरुद्ध गर्दै आएका थिए।

प्रतिनिधिसभाको बैठक आज बिहान ११ बजे बस्ने भएको छ। बैठकमा संस्कृति, पर्यटन तथा नागरिक उड्डयनमन्त्री खडकराज पौडेलले पर्यटन विधेयक, २०८१ माथि विचार गरियोस् भन्ने प्रस्ताव प्रस्तुत गर्नेछन्। साथै, प्रधानमन्त्री वालेन्द्र शाहका तर्फबाट कानुन, न्याय तथा संसदीय मामिलामन्त्री सोविता गौतमले राष्ट्रिय विधि विज्ञान प्रयोगशाला (स्थापना र सञ्चालन) विधेयक, २०८१ लाई दफावार छलफलका लागि सम्बन्धित समितिमा पठाउने प्रस्ताव प्रस्तुत गर्नेछिन्।