NepalWatch

संघीय संसदको प्रतिनिधिसभा अन्तर्गतको कृषि, सहकारी तथा प्राकृतिक स्रोत समितिले रासायनिक मलको सहज आपूर्ति, मौज्दातको वर्तमान अवस्था र वितरण प्रणालीबारे छलफल गरेको छ। बैठकमा कृषि सामग्री कम्पनी लिमिटेड र साल्ट ट्रेडिङ कर्पोरेशन लिमिटेडका पदाधिकारीहरूसँग आगामी खेती मौसमलाई लक्षित गरी आपूर्ति व्यवस्थापन प्रभावकारी बनाउने विषयमा विस्तृत छलफल भएको छ। सांसदहरूले यस वर्ष मलको अभाव हुन नदिन सरकारको ध्यानाकर्षण गराएका छन्।

म्याग्दीको धौलागिरि गाउँपालिका–२ मा रहेको पर्यटकीयस्थल जलजलामा पर्यटकको सुविधाका लागि स्थानीय पशुपालक किसानहरूले ‘गोठस्टे’ (गोठबास) सञ्चालन गरेका छन्। बस्ती र होटल नभएको यस क्षेत्रमा पर्यटकलाई खाने र बस्ने सुविधा दिन यो नयाँ अवधारणा ल्याइएको हो। ढोरपाटन शिकार आरक्षको नीतिगत व्यवस्थाका कारण पक्की संरचना बनाउन नमिल्ने भएपछि गोठमै पर्यटक राख्ने व्यवस्था मिलाइएको छ।

नेपाल क्रिकेट संघ (क्यान) ले सिंगापुरमा मे ३१ देखि जुन ९ सम्म हुने पुरुष एसियन गेम्स क्रिकेट छनोट प्रतियोगिताका लागि दीपेन्द्र सिंह ऐरीको कप्तानीमा १४ सदस्यीय नेपाली टोली घोषणा गरेको छ। यस छनोट प्रतियोगिताबाट शीर्ष चार टोलीले सन् २०२६ मा जापानमा हुने एसियन गेम्समा स्थान सुरक्षित गर्नेछन्।

संखुवासभाको मकालु वरुण राष्ट्रिय निकुञ्जले २५ जेठदेखि एक महिनाका लागि बहुमूल्य जडीबुटी यार्सागुम्बा संकलन गर्न खुला गरेको छ। निकुञ्ज कार्यालयका सूचना अधिकारी संस्कार सुवेदीका अनुसार यस अवधिमा दुई प्रजातिका यार्सा संकलन गर्न पाइनेछ।

प्रधानमन्त्री बालेन साहले चिकित्सा शिक्षा आयोगको उपाध्यक्षको जिम्मेवारी डा. श्रीकृष्ण गिरीलाई दिएका छन्। सरकारले सार्वजनिक पदाधिकारीको पदमुक्ति सम्बन्धी विशेष व्यवस्था गर्न बनेको अध्यादेश ल्याएपछि आयोगका उपाध्यक्ष डा. अञ्जनी कुमार झा लगायतका पदाधिकारी पदमुक्त भएका थिए।

अर्थमन्त्री डा. स्वर्णिम वाग्लेले संघीय संसद्मा आर्थिक वर्ष २०८२/८३ को आर्थिक सर्वेक्षण प्रस्तुत गर्दै चालू आर्थिक वर्षमा नेपालको अर्थतन्त्र ३.८५ प्रतिशतले विस्तार हुने अनुमान गरिएको बताएका छन्। विश्व अर्थतन्त्र ३.१ प्रतिशतमा खुम्चने प्रक्षेपण भइरहेका बेला नेपालको यो वृद्धिदरलाई सकारात्मक मानिएको छ। सर्वेक्षणअनुसार मुलुकको अर्थतन्त्रको कुल आकार ६६ खर्ब रुपैयाँ पुग्ने र नेपालीको प्रतिव्यक्ति कुल राष्ट्रिय आय १,५३५ अमेरिकी डलर पुग्ने प्रक्षेपण गरिएको छ।

राष्ट्रिय मानव अधिकार आयोगले भदौ २३ र २४ गतेको जेनजी आन्दोलनका क्रममा मानव अधिकार उल्लंघन गरेको ठहर गर्दै तत्कालीन प्रधानमन्त्री केपी शर्मा ओली, गृहमन्त्री रमेश लेखक र सञ्चारमन्त्री पृथ्वी सुब्बा गुरुङविरुद्ध कारबाही गर्न सरकारलाई सिफारिस गरेको छ। प्रचलित कानुनमा स्पष्ट व्यवस्था नभएकाले नयाँ कानुन बनाएर कारबाही गर्न आयोगले सुझाव दिएको छ।

सरकारले विभिन्न आठ विश्वविद्यालयका उपकुलपति नियुक्तिका लागि प्राप्त २१८ आवेदनमध्ये १८८ योग्य दरखास्त स्वीकृत गरेको छ। 'विभिन्न विश्वविद्यालयको उपकुलपति छनोट तथा सिफारिससम्बन्धी एकीकृत कार्यविधि, २०८३' अनुसार सिफारिस समितिले जेठ १३ गतेको निर्णयअनुसार विश्वविद्यालयगत रूपमा योग्य उम्मेदवारहरूको दरखास्त स्वीकृत गरेको हो। यस प्रक्रियाबाट त्रिभुवन विश्वविद्यालय, पोखरा विश्वविद्यालय, पूर्वाञ्चल विश्वविद्यालय, लुम्बिनी बौद्ध विश्वविद्यालय, कृषि तथा वन विज्ञान विश्वविद्यालय, मध्यपश्चिम विश्वविद्यालय, सुदूरपश्चिम विश्वविद्यालय र राजर्षि जनक विश्वविद्यालयका लागि उपकुलपति छनोट गरिनेछ।

स्वास्थ्य बीमा बोर्डले वित्तीय संकटको कारण देखाउँदै जेठ १६ गतेदेखि लागू हुने गरी निजी स्वास्थ्य संस्थामा आकस्मिकबाहेकका सबै स्वास्थ्य बीमा सेवा स्थगित गरेको छ। बोर्डको जेठ ११ गते बसेको बैठकले गरेको यो निर्णयले स्वास्थ्य बीमा कार्यक्रममा आबद्ध निजी स्वास्थ्य संस्थाहरूबाट प्रदान गरिने नियमित सेवाहरू अर्को सूचना नभएसम्मका लागि बन्द रहनेछ।

लुम्बिनी प्रदेश सरकारले आर्थिक वर्ष २०८३/८४ को लागि नीति तथा कार्यक्रम प्रदेशसभामा प्रस्तुत गरेको छ। प्रदेश प्रमुख कृष्णबहादुर घर्तीमगरले प्रस्तुत गरेको नीति तथा कार्यक्रममा सुशासन, आर्थिक समृद्धि र प्रशासनिक सुधारलाई प्राथमिकता दिइएको छ। यसअन्तर्गत हाल कायम रहेका १२ मन्त्रालयलाई घटाएर ८ मा झारिने घोषणा गरिएको छ।

प्रधानमन्त्री बालेन्द्र शाहले युरोपेली संघ (ईयू) मा आबद्ध देशका राजदूतहरूसँगको भेटमा नेपाली नागरिकको दैनिक जीवनस्तर उकास्ने र सुशासन कायम गर्ने सरकारको प्रतिबद्धता दोहोर्‍याएका छन्। उनले नयाँ सरकार गठन भए पनि नीतिगत निरन्तरता रहने, लोकतान्त्रिक मूल्यमान्यताको संरक्षण र राजनीतिक स्थिरता कायम गरिने स्पष्ट पारे। प्रधानमन्त्रीले नेपालले सन्तुलित र व्यावहारिक विदेश नीति अवलम्बन गर्ने तथा व्यापार, लगानी, हरित ऊर्जा, जलवायु र पर्यटनजस्ता क्षेत्रमा सहकार्य सुदृढ गरिने बताए।