BIZMANDU

म्याग्दीको रघुगंगा गाउँपालिका-२ माथिल्लो बैसरी (सिरुवारी)मा पहिरो खसेपछि मुस्ताङलाई राष्ट्रिय राजमार्गसँग जोड्ने बेनी-जोमसोम सडकखण्ड अवरुद्ध भएको छ। यसका कारण बेनीदेखि मुस्ताङ र जोमसोमदेखि बेनीतर्फ आउँदै गरेका सवारीसाधन बीच बाटोमै रोकिएका छन्। स्थानीयवासीका साथै मुस्ताङ भ्रमण तथा मुक्तिनाथ दर्शनका लागि जाने पर्यटक र तीर्थयात्रीहरू प्रभावित भएका छन्।

काठमाडौं इन्स्टिच्युट अफ चाइल्ड हेल्थ (किओच) को नवनिर्मित बाल अस्पतालको पश्चिमतर्फको भवन ७१ करोड रुपैयाँ लागतमा व्यवसायी मीनबहादुर गुरुङको पहलमा निर्माण सम्पन्न भई व्यवस्थापनलाई हस्तान्तरण गरिएको छ। जगत्गुरु शंकराचार्य श्री विधुशेखर भारतीले भवनको समुद्घाटन गरेका छन् भने पूर्वप्रधानमन्त्री सुशीला कार्कीले यसले बालबालिका र गरिबलाई सर्वसुलभ स्वास्थ्य सेवा प्रदान गर्ने बताइन्।

राष्ट्रिय गौरवको आयोजना सुनकोशी मरिण डाइभर्सन आयोजनाको ठेक्कामा लापर्वाही गर्ने रमण-पटेल जेभीलाई सरकारले तीन वर्षका लागि कालोसूचीमा राखेको छ। सार्वजनिक खरिद अनुगमन कार्यालयले जनकपुरस्थित रमण कन्स्ट्रक्सन प्रालि र भारत मुम्बईको पटेल इन्जिनियरिङ लिमिटेड रहेको उक्त जेभीलाई सम्झौताअनुसार काम नगरेको भन्दै कारबाही गरेको हो। यसअघि गत वर्ष कात्तिकमा आयोजनाले कम्पनीसँग स्पष्टीकरण मागेको थियो।

प्रहरीले पूर्वाधार विकास मन्त्रालयका सचिवलाई कार्यकक्षमै प्रवेश गरी धम्की दिएको आरोपमा उपेन्द्रकुमार शाहीलाई पक्राउ गरेको छ। काठमाडौं जिल्ला अदालतले शाहीलाई आपराधिक लाभ लिन नहुने कसुरमा पाँच दिन थुनामा राखेर अनुसन्धान गर्न अनुमति दिएको छ। शाहीले जेठ ११ गते सचिवको कार्यकक्षमा अनधिकृत रूपमा प्रवेश गरी हुलहुज्जत र अभद्र व्यवहार गरेको प्रहरीको भनाइ छ।

कामना सेवा विकास बैंकले आफ्नो संस्थागत सामाजिक उत्तरदायित्व अन्तर्गत मोरङस्थित नेपाल रेडक्रस सोसाइटीलाई १० थान डोनर बेड हस्तान्तरण गरेको छ। बैंकले विराटनगर शाखा कार्यालयमार्फत उक्त सहयोग प्रदान गरेको हो, जसको उद्देश्य रक्तसञ्चार सेवाको प्रभावकारी सञ्चालन तथा गरिब र विपन्न वर्गका बिरामीहरूलाई समयमै रगत उपलब्ध गराउनु रहेको छ।

इलामका चिया र दुग्ध उद्योगहरू बजारीकरण तथा भुक्तानी अभावका कारण संकटमा परेका छन्। नेपाली कांग्रेसका सचेतक निश्कल राईले सरकारको ध्यानाकर्षण गराउँदै दुग्ध विकास संस्थानले किसानको करिब ५० करोड रुपैयाँ भुक्तानी रोकेको आरोप लगाएका छन्। यसले किसानको दैनिक जीवन, बैंक किस्ता तिर्ने क्षमता र पशु आहार खरिदमा समेत असर परेको छ।

स्वास्थ्य बीमा बोर्डले वित्तीय संकटको कारण देखाउँदै जेठ १६ गतेदेखि लागू हुने गरी निजी स्वास्थ्य संस्थामा आकस्मिकबाहेकका सबै स्वास्थ्य बीमा सेवा स्थगित गरेको छ। बोर्डको जेठ ११ गते बसेको बैठकले अर्को सूचना जारी नभएसम्मका लागि यो निर्णय गरेको हो।

श्रम संस्कृति पार्टीका अध्यक्ष हर्क साम्पाङले प्रधानमन्त्री बालेन शाहलाई संसदमा उपस्थित गराउन सभामुखले रुलिङ नगरेको भन्दै प्रतिनिधिसभाको बैठक बहिष्कार गरेका छन्। उनले प्रधानमन्त्रीलाई सदनमा जवाफदेही बनाउनुपर्ने वा आफूलाई बैठकबाट निष्कासन गर्नुपर्ने माग राखेका थिए। सभामुखले रुलिङ नगरेपछि साम्पाङले झोला बोकेर बैठक कक्ष छाडेका हुन्।

अर्थमन्त्री डा. स्वर्णिम वाग्लेले नेपालमा सार्वजनिक ऋणको आकार तीव्र रूपमा बढिरहेको र आगामी आर्थिक वर्ष २०८३/८४ को बजेट कृत्रिम रूपमा ठूलो नबनाइने बताएका छन्। अर्थ मन्त्रालयले सीमित स्रोत साधनको बाध्यतामा बजेट निर्माण गरिरहेको र अब खर्च गर्न सक्ने क्षमताअनुसार बजेट ल्याइने उनको भनाइ छ।

वैदेशिक रोजगार विभागले नेपाल सरकार र इजरायल सरकारबीच भएको श्रम सम्झौता अनुसार इजरायलका दीर्घकालीन स्याहार केन्द्रमा २३०० जना नेपाली सहायक कामदार पठाउन आवेदन खुला गरेको छ। यस रोजगारीका लागि २५ देखि ४५ वर्ष उमेर समूहका नेपाली नागरिकले अनलाइनमार्फत आवेदन दिन सक्नेछन्।

नेपाल बीमा प्राधिकरणको रिक्त अध्यक्ष पदमा नियुक्तिका लागि अर्थ मन्त्रालयले आवेदन आह्वान गरेको छ। सिफारिस समितिले सार्वजनिक सूचना जारी गर्दै निर्धारित योग्यता पुगेका नेपाली नागरिकलाई जेठ १९ गतेभित्र आवेदन पेश गर्न आग्रह गरेको छ।

लुम्बिनी प्रदेश सरकारले आर्थिक वर्ष २०८३/८४ को लागि नीति तथा कार्यक्रम प्रदेशसभामा प्रस्तुत गरेको छ। प्रदेश प्रमुख कृष्णबहादुर घर्तीमगरले प्रस्तुत गरेको नीति तथा कार्यक्रममा सुशासन, आर्थिक समृद्धि र प्रशासनिक सुधारलाई प्राथमिकता दिइएको छ। यसअन्तर्गत हाल कायम रहेका १२ मन्त्रालयलाई घटाएर ८ मा झारिने घोषणा गरिएको छ।